యూట్యూబ్​ చూసి నాటుబాంబుల తయారీ.. అమ్మడానికి వెళ్తుండగా..

యూట్యూబ్ లో చూసి నాటుబాంబులు తయారు చేశాడో యువకుడు. తయారు చేసిన బాంబులను విక్రయించడానికి వెళ్తుండగా.. పోలీసులు అరెస్టు చేశారు. ఇంతకీ.. అతగాడు ఈ నాటు ప్రయోగం ఎందుకు చేశాడో తెలుసా?

అనంతపురం జిల్లా మడుగుపల్లి గ్రామంలో నాటు బాంబులు తయారు చేస్తున్న యువకుడిని పుట్లూరు పోలీసులు అరెస్టు చేశారు. తయారు చేసిన నాటుబాంబులను విక్రయించడానికి వెళుతుండగా పోలీసులు అతన్ని పట్టుకున్నారు.

పుట్లూరు మండలం మడుగుపల్లి గ్రామానికి చెందిన యాపర్ల నరేష్ కుమార్ రెడ్డి(24)అనే యువకుడు డబ్బు సంపాదించాలని నాటుబాంబులను తయారు చేయాలనుకున్నాడు. నాటుబాంబులను ఎలా తయారు చేయాలో యూట్యూబ్​లో చూసి నేర్చుకున్నాడు.

నాటుబాంబుల తయారీకి కావల్సిన సామాగ్రిని సిద్ధం చేసుకున్నాడు. ఊరిబయట ఉన్న అరటి తోటలో రెండు నాటుబాంబులను తయారు చేశాడు. ఆ బాంబులను అమ్మడానికి అనంతపురం వెళుతుండగా.. మడుగుపల్లి నుంచి నార్పలకు వెళ్లే దారిలో పోలీసులు అతన్ని పట్టుకున్నారు. నరేష్ కుమార్ రెడ్డిపై కేసు నమోదు చేసి రిమాండ్ కి తరలించారు.

ఇదీ చదవండి:ఉగండాలో కుమారుడు పోస్టు.. కదిరిలో పోలీస్​స్టేషన్​కు తండ్రి