TOMATO: అనంతలో 'టమాటా @ 2 రూపాయలు'.. రోడ్డు పక్కన పారబోస్తున్న రైతులు

TOMATO CROP: అనంతపురం జిల్లాలో వాతావరణం టమాటా రైతుకు శత్రువుగా మారింది. వారం రోజులుగా ఎడతెరపి లేకుండా కురిసిన వర్షాలతో.. వేల టన్నుల పంట తోటల్లోనే కుళ్లిపోయింది. అటు దేశవ్యాప్తంగా వర్షాలతో రవాణా నిలిచి .. ధరలు పాతాళానికి పడిపోయాయి. మార్కెట్‌కు తెచ్చినా కిలో 2 రూపాయలకు కూడా కొనడం లేదు. విధిలేని పరిస్థితుల్లో రైతులు రోడ్డు పక్కన పారబోస్తున్నారు.

TOMATO CROP DAMAGED: అనంతపురం జిల్లాలో టమాటా పంట కుళ్లి చేతికి రాకుండా పోయింది. వారం రోజులకు పైగా కురిసిన వర్షాలతో తోటల్లో నీరు నిలిచి .. 80 శాతానికి పైగా పంట పాడైంది. ఉమ్మడి అనంతపురం జిల్లాలో 698 హెక్టార్లలో ఈ పంట సాగుచేశారు. ఎకరాకు 35 నుంచి 40 వేల రూపాయల పెట్టుబడి పెట్టారు. కానీ పంటంతా వర్షార్పణమైంది. కొద్దోగొప్పో మిగిలిన పంటను మార్కెట్‌కు తెచ్చినా.. కూలీ ఖర్చులు కూడా రావడం లేదని రైతులు వాపోతున్నారు. దెబ్బతిన్న పంటను తీసుకోకుండా ..మండీ యజమానులు, వ్యాపారులు వెనక్కి పంపుతున్నారని ఆవేదన వ్యక్తం చేస్తున్నారు.

అనంతపురం, శ్రీ సత్యసాయి జిల్లాల్లో ఎన్నడూ లేనంతగా ఈసారి భారీ వర్షాలు కురిశాయి. సగానికి పైగా మండలాల్లో 6 నుంచి 10 సెంటీమీటర్ల వర్షం పడింది. దీని వల్ల టమాటా తోటల్లో నీరు నిలిచి .. ఎగుమతి చేసేంత నాణ్యత రాలేదు. ఏం చేయాలో పాలుపోక రైతులు పంటను పశువులు, గొర్రెలకు వదిలేస్తున్నారు.

ఏటా టమాటాకు ధర లేక రైతులు నష్టపోతున్నారని.. ప్రాసెసింగ్ పరిశ్రమ తెచ్చి ఆదుకుంటామని .. ఏడాదిన్నర కిందట ఎంపీ తలారి రంగయ్య ప్రకటించారు. ఆ తర్వాత మైసూర్ నుంచి రక్షణశాఖ ఆహార పరిశోధన సంస్థ శాస్త్రవేత్తలు వచ్చి.. టమాటాపై పరిశోధనలు చేశారు. జిల్లాలో పండే పంట నాణ్యమైనదని.. పలు ఉత్పత్తులు తయారు చేయవచ్చని గుర్తించారు. పరిశోధనా ఫలితాల సాంకేతిక పరిజ్ఞానం జిల్లా అధికారులకు అందించారు. పరిశ్రమల స్థాపనకు ముందుకొచ్చేవారికి సాంకేతిక సహకారం అందిస్తామని హామీ ఇచ్చారు. కానీ అధికారుల చిత్తశుద్ధి లోపంతో.. ఒక్క పరిశ్రమ రాలేదు. దీంతో పంటను కొనేదిక్కులేక రైతులు రహదారుల పక్క గుట్టలుగా పారబోస్తున్నారు.

ఇవీ చదవండి: