అనంతపురం జిల్లా కేంద్రంలోని క్యాన్సర్‌ ఆసుపత్రిలో ఆక్సిజన్ సరఫరాలో ఇబ్బందులు తలెత్తుతున్నాయని అధికారులకు సూచించినా ఎలాంటి చర్యలు తీసుకోలేదని మృతుల బంధువులు ఆరోపించారు. ఆక్సిజన్ కొరత ఉందని తెలిసినా దాన్ని సరిచేసేందుకు ఎలాంటి చర్యలు తీసుకోవడం లేదని విమర్శించారు. సకాలంలో ప్రాణవాయువు అంది ఉంటే తమవారు బతికేవారని బోరున విలపించారు. సాయంత్రం 7 నుంచి 8 గంటల వరకు ఆక్సిజన్ సరఫరా నిలిచిపోవడంతో సిబ్బంది ఉరుకుల పరుగుల మీద సరిచేసే ప్రయత్నం చేసినా ఫలితం లేకుండా పోయిందంటున్నారు. 50 మంది రోగులకు ఒక నర్సు ఉన్నారని, దీంతో వారిపై తీవ్ర ఒత్తిడి పడుతోందంటున్నారు. ఒక వ్యక్తి 50 మందికి ఎలా సేవలు అందిస్తారని ప్రశ్నిస్తున్నారు.
ఘటనపై సమాచారం అందుకున్న జిల్లా కలెక్టర్‌ గంధం చంద్రుడు, స్థానిక ఎమ్మెల్యే అనంతవెంకటరామిరెడ్డి హుటాహుటినా క్యాన్సర్‌ ఆసుపత్రికి చేరుకున్నారు. మృతదేహలను పరిశీలించి బంధువులకు ధైర్యం చెప్పారు. అనంతరం ఎమ్మెల్యే మీడియాతో మాట్లాడారు. ఆక్సిజన్ సరఫరాలో లోపం కారణంగానే నలుగురు మృతి చెందారని ఆయన ధ్రువీకరించారు. కరోనా రోగుల బంధువులు ఇష్టారీతినా ఆక్సిజన్ సిలిండర్లను ఆపరేట్‌ చేస్తున్నారని దీనివల్ల మిగతా వారికి ప్రెజర్‌ తగ్గిపోతుందని పేర్కొన్నారు. ఘటనపై అధికారిక ప్రకటన చేయాల్సిన జిల్లా కలెక్టర్‌ గంధం చంద్రుడు మీడియాతో మాట్లడకుండానే వెళ్లిపోయారు. తర్వాత రాత్రి 11 గంటల సమయంలో క్యాన్సర్‌ ఆసుపత్రి సూపరింటెండెంట్‌కు, ఆక్సిజన్ ప్లాంటు నిర్వహకులు వారసి ఏజెన్సీకి షోకాజ్‌ నోటీసులు జారీ చేశారు.