ఎవరికి ఏ అవసరమొచ్చినా ఆ చెట్టే దిక్కు.. ఆ మహిమ ఏంటి..?

Special Story on Tree At Alluri District: ఎవరికి ఏ చిన్న అవసరం వచ్చినా.. చటుక్కున ఆ చెట్టు వద్ద వాలిపోతారు. ఎవరికి డబ్బులు అవసరమైనా ఆ చెట్టు దగ్గరకే వెళ్తారు. స్నేహితులు, ప్రేమికులు ఎవరు గుర్తొచ్చినా.. అక్కడే ప్రత్యక్షమవుతారు. బంధువుల క్షేమ సమాచారాలు తెలుసుకోవాలన్నా.. ఆ చెట్టు వద్దనే ప్రదక్షిణలు చేస్తారు. ఇంతకీ ఆ మహిమ గల చెట్టు ఏమిటో తెలుసుకోవాలనుకుంటున్నారా. అయితే పదండి చూసొద్దాం.

Alluri District News: ఉదయం నుంచి అర్ధరాత్రి వరకు ఈ చెట్టు కిందే జనమంతా గుమిగూడుతారు.. ఏ సమయంలో చూసినా ఈ చెట్టు కింద జనం పోగై ఉంటారు. అల్లూరి జిల్లా జి.మాడుగుల మండలం వాకపల్లి కొండ రహదారిలోని ఈ వృక్షం ఇక్కడ సెల్ టవర్‌లా పని చేస్తోంది. చుట్టుపక్కల 15 కిలోమీటర్ల లోపు సెల్‌ సిగ్నల్‌ ఇక్కడ మాత్రమే ఉంటుంది. అందుకే..ఆన్​లైన్​లో క్లాసులైనా, సెల్‌ ఫోన్‌ చాటింగ్‌లైనా.. బ్యాకింగ్‌ అవసరాలైనా.. అందరూ ఇక్కడే వాలిపోతారు.

పింఛన్​ తీసుకోవాలంటే వేలిముద్రాలు వేయాలి.ఊరిలో సిగ్నల్స్​ లేకపోవడంతో బయోమెట్రిక్​కు అంతరాయం కలుగుతోంది. పింఛన్ కోసం చాలా దూరం వెళ్లాల్సి వస్తుంది.సేవల కోసం సుమారు 9 కిలోమీటర్లు దూరం వెళ్లాలి. గ్రామంలో ఫోన్లు కూడా సరిగా కలవవు. ప్రస్తుతం ఎలాంటి ఆన్​లైన్​ సేవలు కావాలన్న ఇక్కడికే రావాల్సి వస్తోంది. నెట్​వర్క్​ వంటి సమస్యల నుంచి బయట పడాలనుకునేవారికి ఈ చెట్టే దిక్కు అవుతుంది. అధికారులకు పలుమార్లు చెప్పినా ఎలాంటి ఫలితం లేదు. ఇప్పటికైనా అధికారులు స్పందించి సిగ్నల్స్​ సదుపాయం కల్పించాలి. - స్థానికులు

మిత్రులతో సంభాషించడానికి, బంధువుల యోగక్షేమాలు తెలుసుకోవడానికి, సుదూర ప్రాంతాల నుంచి వ్యయప్రయాసలకోర్చి ఇక్కడికి వస్తుంటారు. మండల కేంద్రం దూరంగా ఉండటం, బ్యాంకు అందుబాటులో లేకపోవడంతో యూపీఐ లావాదేవీలు, ఇతర బ్యాంకింగ్ సేవల కోసం ఈ చెట్టు కిందకు రావాల్సి వస్తోంది. సమీపంలోని వారికి బయోమెట్రిక్ సేవలు అందాలన్నా ఈ చెట్టే దిక్కవుతోంది. యూట్యూట్‌లో టైలరింగ్ మెళకువలు తెలుసుకోవడానికి కూడా మహిళలు ఇక్కడ ప్రత్యక్షం అవుతున్నారు. సెల్ టవర్ కోసం అధికారులకు మొరపెట్టుకున్నా.. స్పందించడం లేదని స్థానికులు అసహనం వ్యక్తం చేస్తున్నారు.

ఇదీ చదవండి: