తమిళంలో అర్జున్​రెడ్డిగా.. తెలుగు ద్వారక

విజయ దేవరకొండ కథానాయకుడిగా తెలుగులో రూపొందిన ద్వారక చిత్రం తమిళంలో... అర్జున్ రెడ్డిగా విడుదల కానుంది.

విజయ దేవరకొండ కథానాయకుడిగా నటించిన ద్వారక చిత్రం తమిళ ప్రేక్షకులను అర్జున్ రెడ్డిగా పలకరించనుంది. దేశవ్యాప్తంగా అర్జున్ రెడ్డి పేరు అందరికీ సుపరిచితమైనందువల్ల ఈ చిత్రానికి అదే పేరును పెట్టినట్లు చిత్రవర్గాలు వెల్లడించాయి. ఈ చిత్రాన్ని శ్రీలక్ష్మీజ్యోతి క్రియేషన్స్‌ బ్యానరుపై ఏఎన్‌ బాలాజీ తమిళంలో నిర్మిస్తున్నారు. పూజా జవేరి కథానాయికగా నటించింది. ప్రకాశ్‌రాజ్‌, మురళీ శర్మ, ప్రభాకర్‌ సురేఖలు ఇతర తారాగణం. సాయి కార్తిక్ సంగీతం సమకూర్చగా సినిమాటోగ్రాఫర్​గా శ్యామ్ కె.నాయుడు పనిచేశారు. శ్రీనివాస రవీంద్ర దర్శకత్వం వహించారు. యాక్షన్, కమర్షియల్, ప్రేమ వంటి ఆకట్టుకునే అంశాలతో తెలుగు ప్రేక్షకులు ఆదరణ పొందిన ఈ చిత్రాన్ని తమిళ సినీ ప్రియులకు అందించాలనే ఉద్దేశంతో అనువాదం చేశామని నిర్మాత ఏఎన్ బాలాజీ తెలిపారు. త్వరలోనే పాటలు విడుదల చేస్తామని చెప్పారు.