పరిశుభ్రంగా...
సందర్భం ఎంత చిన్నదైనా... మోముని మెరిపించుకోవడానికి ఇప్పుడు అందరూ తప్పనిసరిగా మేకప్‌ని వాడుతున్నారు. నాణ్యమైన ఉత్పత్తులు వాడకపోయినా పర్వాలేదు కానీ.. గడువు దాటినవీ, ఇతరులవీ వాడితే చర్మ సంబంధిత సమస్యలు రావొచ్చు. అలానే ఎక్కువ సమయం ఉంచుకోవడం, రాత్రి తొలగించుకోకుండా పడుకోవడం వల్ల కూడా ఇబ్బందులు తలెత్తుతాయి. వీలైనంత తక్కువగా మేకప్‌ వేసుకోవడంతో పాటు... నాణ్యమైన రకాల్ని పరిశుభ్రమైన విధానాల్లో వాడటం మంచిది.
వదులుగా...
శరీరానికి అతుక్కుపోయేలా ఉండే డ్రెస్‌లు, లెగ్గింగ్‌లు, ప్యాంట్లు ఇప్పుడు ఎక్కువగా వాడుతున్నారు. చెమట వల్ల చర్మ, తదితర సమస్యలు రావొచ్చు. క్లోజ్డ్‌ ఫిట్టింగ్‌ స్కర్టులు, బాడీషేపర్ల వల్ల నరాలు, కండరాల నొప్పులు, డిస్క్‌ సమస్యలు రావొచ్చు. వీలైనంతవరకూ వీటి జోలికి పోవద్దు. కాస్త వదులుగా ఉండేలా చూసుకోవడం వల్ల ఈ ఇబ్బందిని తొలగించుకోవచ్చు.
తక్కువ సమయం...
ట్రెండ్‌, మ్యాచింగ్‌ల పేరుతో ఫ్యాషన్‌ జ్యూయలరీని విరివిగా వాడుతోంది ఈ తరం. కొందరిలో అలర్జీల కారణంగా ఆ ప్రాంతంలో కమిలిపోవడం, నల్లగా మారడం, చీము పట్టడం వంటి ఇబ్బందులు ఎదురవుతాయి. ఇక బరువైనవి ఎంచుకోవడం వల్ల చెవి తమ్మి సాగిపోయే ప్రమాదం ఉంది. గిల్టు నగలు పడనివారు... నేరుగా పెట్టుకోకుండా వాటి శీలలకు నెయిల్‌పెయింట్‌ వేయడం వల్ల కొంతవరకూ ప్రభావాన్ని తగ్గించొచ్చు. బరువైనవాటిని తక్కువ సమయం మాత్రమే ధరించేలా చూసుకోండి.