తెలంగాణలోని వనపర్తి జిల్లా అమరచింత మండలం సింగంపేట గ్రామానికి చెందిన కమ్మరిరాజు అనే వ్యక్తి మూగజీవాల రక్తం తాగుతూ జనాలను భయాందోళనలకు గురి చేస్తున్నాడు. అమావాస్య వచ్చిందంటే చాలు గొర్రెలు, మేకల గొంతుకోసి వాటి రక్తం తాగుతున్నాడు. అలా ఇప్పటికీ 50 మూగజీవాల ప్రాణం తీశాడు. రాజు తీరుపై అనుమానం వచ్చిన గ్రామస్థులు అతడిని నిలదీయగా నాలుగైదు సంవత్సరాలుగా ఇలా మూగజీవాల రక్తం తాగుతున్నట్లుగా వివరించాడు.
కుటుంబ సభ్యుల అసహనం
రాజు ఆగడాలపై కుటుంబీకులు సైతం అసహనం వ్యక్తం చేస్తున్నారు. ఎంత చెప్పినా అతడి ప్రవర్తనలో మార్పు కనిపించడం లేదంటూ ఆవేదన వ్యక్తం చేస్తున్నారు. రాజు చేష్టలతో ఎన్నోసార్లు చనిపోయిన మేకలు, గొర్రెలకు పరిహారం చెల్లించామని వాపోతున్నారు. రాజు మానసిక స్థితి బాగాలేదని... అతడికి మెరుగైన చికిత్స అందించేందుకు ప్రభుత్వం సాయం అందించాలని కుటుంబీకులు కోరుతున్నారు.