కల్యాణమొచ్చినా... కక్కొచ్చినా... ఆగదంటారు. రాసిపెట్టుంటే... ఎన్ని విఘ్నాలెదురైనా పంచభూతాలే పెళ్లిపెద్దలై ఇద్దరినీ ఒక్కటి చేస్తాయంటారు. ఇక్కడ మాత్రం వేరువేరు రూపాల్లో విఘ్నాలు ఎదురై పెళ్లిని అడుగడుగునా అడ్డుకున్నాయి.
బంధువుల హడావుడి... మధ్య సాగుతున్న పెళ్లిలో ఒక్కసారిగా.. 'ఆపండి' అంటూ ఓ యువతి ఆర్తనాదం. అంతా నిశ్శబ్దం. వరుడు తనను ప్రేమించి వేరే అమ్మాయి మెళ్లో తాళి కట్టేందుకు సిద్ధమయ్యాడంటూ... అందరి గుండెల్లో ఆ యువతి బండేసింది. ఆ విఘ్నాన్ని జయించి ఎలాగోలా వివాహాన్ని జరుపాలనుకుంటే... అసలుకే ఎసరు వచ్చింది. చివరికి ఆ మంటపంలో జరగాల్సిన పెళ్లి మధ్యలోనే ఆగిపోయింది.
తెలంగాణలోని సికింద్రాబాద్ మోండామార్కెట్ పీఎస్ పరిధిలోని వెస్లీ చర్చిలో జనగామ జిల్లా గుమ్మడి పాలెంకు చెందిన అనిల్... తుకారం గేట్కు చెందిన అమ్మాయితో పెళ్లి జరుగుతోంది. ఇంతలో ఓ యువతి వచ్చి పెళ్లిని అడ్డుకుంది. వరుడు అనిల్ తనను ప్రేమించి మోసం చేశాడని గొడవకు దిగింది. విషయం తెలుసుకొని పోలీసులు రంగప్రవేశం చేయగా... అనిల్కు ఆ యువతికి సంబంధం ఉన్నట్లు ఎలాంటి ఆధారాలు లేవని తేల్చి... ఆ అమ్మాయిని మంటపం నుంచి పంపించేశారు.
ఇక పెళ్లిని ఎలాంటి అడ్డంకి లేకుండా జరపాలని అందరూ ప్రార్థిస్తున్న సమయంలోనే... మరో విఘ్నం రానే వచ్చింది. ఈ సారి ఆ ఇబ్బంది... చైల్డ్లైన్ అధికారుల రూపంలో ఎంటరైంది. పెళ్లి మండపంలోకి ప్రవేశించిన అధికారులు వధువు వయస్సు ఆరాతీశారు. పెళ్లికూతురు వయస్సు 17 ఏళ్లని తేలింది. అప్రమత్తమైన బంధువులు.. పెళ్లి కూతురును కనిపించకుండా వరంగల్ పంపినట్లు అధికారులు తెలుసుకున్నారు.
ఈసారి మాత్రం పెళ్లి పూర్తిగా రద్దయింది. మధ్యలోనే ఆ మ్యారేజ్ ఈవెంట్కు శుభం కార్డు పడింది. మరోవైపు... చైల్డ్లైన్ అధికారులు మోండా మార్కెట్ పీఎస్లో ఫిర్యాదు చేయగా... వివాహ బంధువులపై కేసు నమోదు చేసి దర్యాప్తు ప్రారంభించారు.
