కర్ణాటక రాష్ట్ర మాజీ ముఖ్యమంత్రి ధరంసింగ్‌ సమీప బంధువు సిద్ధార్థ దేవేందర్‌ హత్యకేసు నిందితుల్లో ఇద్దరు ఆత్మహత్యకు ప్రయత్నించగా, వారిలో ఒకరు మృతి చెందారు. మరొకరు తీవ్రగాయాలతో ఆసుపత్రిలో చికిత్స పొందుతున్నాడు. హత్య ఉదంతాన్ని కర్ణాటక పోలీసులు గుర్తించడంతోనే భయంతో ఆత్మహత్యాయత్నానికి పాల్పడ్డట్లు సమాచారం. ఈ ఘటన ఆలస్యంగా వెలుగులోకి వచ్చింది.
వివరాల్లోకి వెళ్తే...
తిరుపతి కొర్లగుంటకు చెందిన చెన్నారెడ్డి కుమారుడు శ్యాంసుందర్‌రెడ్డి (28) బీటెక్‌ పూర్తి చేశాడు. 2014 నుంచి ఉద్యోగాల పేరుతో చెన్నై, బెంగళూరు తిరుగుతున్నాడు. అదే సమయంలో బెంగళూరులో ఉన్న తన స్నేహితుడు, తిరుపతి కొర్లగుంట ప్రాంతానికి చెందిన వినోద్‌ వద్దకు వెళ్లి గత కొంతకాలంగా అక్కడే ఉన్నాడు. వారం రోజుల కిందట వీరిద్దరూ తిరుపతికి చేరుకున్నారు. అయితే గత నెల 19వ తేదీ నుంచి కనబడని సిద్దార్థ దేవేందర్‌ హత్యకు గురైనట్లు.. అందులో వీరు పాత్రదారులని పోలీసులు గుర్తించినట్లు పసిగట్టారు. పోలీసులు ఇంటికి వస్తారని భయపడి ఇద్దరూ ఆత్మహత్య చేసుకోవాలని నిర్ణయించుకున్నారు. తిరుపతి - రేణిగుంట మార్గంలోని రైలు కిందపడటానికి వినోద్‌ యత్నించగా రైలు వేగానికి పక్కకు పడ్డాడు. కాలు, చేయి విరగడంతో స్థానికులు, కుటుంబసభ్యులు స్థానిక ప్రైవేటు ఆస్పత్రికి తరలించారు. ఆస్పత్రిలో ఉన్నట్లు గుర్తించిన కర్ణాటక పోలీసులు అక్కడికి చేరుకుని వినోద్‌ను అదుపులోకి తీసుకున్నారు.