ప్రసూతి ఆస్పత్రిలో విధులు నిర్వహిస్తున్న ఓ మహిళపై భర్త అనుమానంతో దాడి చేసిన ఘటన తిరుపతి గ్రామీణ మండలం దుర్గసముద్రంలో జరిగింది. గ్రామానికి చెందిన త్రివేణి, శరణ్‌ భార్యభర్త. త్రివేణి తిరుపతిలోని ప్రభుత్వ ప్రసూతి ఆస్పత్రిలో సపోర్ట్‌ స్టాఫ్‌గా విధులు నిర్వహిస్తోంది. ఈ క్రమంలో శరణ్‌ అనుమానంతో విధులకు హాజరుకావొద్దంటూ రోజూ భార్యను వేధించేవాడు. తన మాటలు వినకుండా విధులకు హాజరైందని త్రివేణిపై దాడికి పాల్పడ్డాడు. విషయం తెలుసుకున్న త్రివేణి సోదరుడు శ్రీనివాసులు ఆమెను తిరుపతిలోని రుయా ఆస్పత్రికి తరలించాడు. వైద్యులు ప్రథమ చికిత్స అందించి అనంతరం నగరంలోని ఓ ప్రైవేట్‌ ఆస్పత్రికి సిఫార్సు చేశారు. ఈ ఘటనపై ముత్యాలరెడ్డిపల్లి సీఐ సురేందర్ రెడ్డి కేసు నమోదు చేసి దర్యాప్తు చేస్తున్నారు.
భార్య పట్ల భర్త అమానుషం