యువతి కిడ్నాప్​.. 'బలవంతంగా బైక్​పై ఎక్కించుకెళ్లారు'

'హెల్ప్.. హెల్ప్' అంటూ కేకలు వేస్తున్న ఓ యువతిని.. గుర్తు తెలియని దుండగులు బలవంతంగా ద్విచక్రవాహనంపై ఎక్కించుకొని తీసుకెళ్లిన ఘటన హైదరాబాద్​లోని బంజారాహిల్స్​లో చోటుచేసుకుంది. స్థానికుల సమాచారంతో కేసు నమోదు చేసుకున్న పోలీసులు.. దర్యాప్తు ప్రారంభించారు.

హైదరాబాద్​లోని బంజారాహిల్స్ పీఎస్ పరిధిలో.. కిడ్నాప్ ఘటన కలకలం రేపింది. మంగళవారం రాత్రి 10 గంటల సమయంలో దేవరకొండ బస్తీలో ఓ యువతి అపహరణకు గురైనట్లు.. స్థానికులు పోలీసులకు సమాచారం అందించారు. 3 బైక్​ల​పై వచ్చిన దుండగులు.. 'హెల్ప్ హెల్ప్' అంటూ కేకలు వేస్తున్న యువతిని బలవంతంగా తీసుకెళ్లినట్లు వారు తెలిపారు.

రంగంలోకి దిగిన పోలీసులు.. కేసు నమోదు చేసుకుని, సీసీటీవీ ఫుటేజీని పరిశీలించారు. అసలు కిడ్నాప్​కు గురైన యువతి.. ఎవరై ఉంటారనే వివరాలను ఆరా తీస్తున్నారు. తెలిసిన వాళ్లే బలవంతంగా ఎక్కించుకుని వెళ్లారా..? మిస్సింగ్​ కేసులేవైనా నమోదయ్యాయా.. అన్న కోణంలో దర్యాప్తు చేస్తున్నారు. పూర్తి వివరాలు తెలియాల్సి ఉంది.

ఇదీ చదవండి:ఏప్రిల్​ 1 నుంచి ఎన్నికల బాండ్ల విక్రయాలు