పాలకొల్లులో రక్తపుధార.. అద్దె అడిగినందుకు దారుణ హత్య

09:40 March 02

పశ్చిమ గోదావరి జిల్లా పాలకొల్లు ముచ్చర్లవారివీధిలో దారుణం జరిగింది. ఇంటి అద్దె అడిగాడన్న కోపంతో యజమాని వంగా ప్రసాద్​ను.. కిరాయికి ఉన్న వ్యక్తి అడపా చినకొండయ్య కిరాతకంగా హతమార్చాడు. తన  ముచ్చర్లవారివీధిలోని వంగా ప్రసాద్‌ (50) ఇంట్లో ఏడాది కాలంగా చినకొండయ్య కుటుంబం అద్దెకు ఉంటోంది. చినకొండయ్య రెండు నెలలుగా ఇంటి అద్దె చెల్లించడం లేదు.

ఈ విషయమై ఇంటి యాజమాని, చిన కొండయ్య మధ్య సోమవారం రాత్రి వాగ్వాదం చోటు చేసుకుంది. ఈ క్రమంలో  చినకొండయ్య పక్కనే ఉన్న రాయితో యజమాని తలపై కొట్టాడు. తీవ్ర రక్తస్రావమై ప్రసాద్‌ అక్కడికక్కడే మృతిచెందాడు. అనంతరం చినకొండయ్య పోలీసుల ఎదుట లొంగిపోయాడు. ఘటనపై కేసు నమోదు చేసిన పోలీసులు దర్యాప్తు చేస్తున్నారు.

ఇదీ చదవండి: