స్నేహితులతో సరదాగా సైకిల్ తొక్కుతూ.. ప్రమాదవశాత్తు కిందపడి మధు అనే విద్యార్థి తీవ్రగాయాలపాలయ్యాడు. ఈ ఘటన అనంతపురం జిల్లా ఉరవకొండ మండలంలోని కౌకుంట్ల గ్రామంలో సోమవారం జరిగింది. ప్రమాదంలో బాలుడి పొట్టభాగం కోసుకుపోయి పేగులు బయటపడ్డాయి. గమనించిన స్థానికులు అతన్ని చికిత్స కోసం ఉరవకొండ ప్రభుత్వ ఆసుపత్రికి తరలించారు.
ప్రమాదంలో గాయపడిన బాలుడికి ఉరవకొండ ప్రభుత్వ ఆసుపత్రి వైద్యులు ప్రథమ చికిత్స అందించారు. అనంతరం మెరుగైన చికిత్సకోసం అత్యవసర వాహనంలో అనంతపురం జిల్లా ఆసుపత్రికి తరలించారు.