నగరమే ప్రధాన కేంద్రమా!: విదేశాలతో హైదరాబాద్‌కు ఉన్న సంబంధాలు, రవాణా సౌకర్యాలను డ్రగ్స్‌ మాఫియా అనుకూలంగా వాడుకుంటోంది. కొవిడ్‌ ఆంక్షలతో రెండేళ్లపాటు వాహనాల రాకపోకలు ఆగిపోవడంతో డ్రగ్స్‌ ముఠాల వద్ద నిల్వ ఉన్న సరుకును బయటకు తరలించటం సవాల్‌గా మారింది. ప్రస్తుతం ఆంక్షలు తొలగడంతో గోదాముల్లో ఉన్న గంజాయి, హెరాయిన్, కొకైన్‌ను మరో ప్రాంతంలో భద్రపరచి అక్కడి నుంచి ఏజెంట్లకు పంపాలనేది మాఫియా ప్రణాళిక. ఇందులో భాగంగానే... హైదరాబాద్ శివారులోని మూతబడిన పరిశ్రమలు, పాత భవనాలను ఎంచుకున్నట్లు తెలుస్తోంది. నిరుద్యోగులు, క్యాబ్‌ డ్రైవర్లకు డబ్బు ఆశ చూపి సరఫరాకు ఉపయోగించుకుంటున్నట్లు సమాచారం. ఈ లింకులను బ్రేక్‌ చేయటం ద్వారా మత్తుపదార్థాల రవాణా అరికట్టవచ్చని పోలీసులు అభిప్రాయపడుతున్నారు.
ఎవరా మహిళా స్మగ్లర్‌?:మహారాష్ట్రకు చెందిన ఇమ్రాన్, వికాస్‌జాదవ్, నౌషద్‌.. ఒడిశాకు చెందిన దశరథ్‌, సంతోష్‌, సుభాష్‌ గంజాయిని ఏపీ, తెలంగాణ, మహారాష్ట్రకు చేరవేసే కీలక సూత్రధారులు. లక్ష్మీపతి, నగేష్, మోహన్‌రెడ్డి వంటి విక్రేతలు.. కొద్దిమొత్తంలో గంజాయి, హాష్‌ ఆయిల్‌ కొనుగోలు చేసి ఎక్కువ ధరకు అమ్ముకుంటారు. ఇప్పటివరకూ విక్రేతలు మాత్రమే అరెస్టవుతుండగా సూత్రధారులు ఎక్కడి నుంచి కార్యకలాపాలు నిర్వహిస్తారనేది పోలీసులకు అంతుచిక్కని ప్రశ్నగా మారింది.
ఇటీవల హైదరాబాద్, రాచకొండ పోలీసులు ముగ్గురు సూత్రధారులను అరెస్ట్‌ చేశారు. హెరాయిన్, కొకైన్, ఎల్ఎస్డీ వంటి పార్టీ డ్రగ్స్‌ అధికశాతం దిల్లీలో ఉన్న నైజీరియన్ల ద్వారా హైదరాబాద్‌కు చేరుతున్నట్లు అబ్కారీశాఖ అధికారులు చెబుతున్నారు. టోలిచౌకి, గోల్కొండ, బండ్లగూడ జాగీరులో మకాం వేసిన నైజీరియన్లకు డార్క్‌నెట్, కొరియర్‌ ద్వారా డ్రగ్స్‌ చేరుతున్నట్టు గుర్తించారు. ముంబయిలోని మహిళా స్మగ్లర్‌ ద్వారా హైదరాబాద్‌లోకి డ్రగ్స్‌ భారీగా చేరుతున్నాయని ఇటీవల అరెస్టయిన నిందితుడి ద్వారా పోలీసులు గుర్తించినట్లు తెలుస్తోంది. గతంలో నగరశివారుల్లో జరిగిన రేవ్‌పార్టీల్లోనూ ఆమె పాల్గొన్నట్లు సమాచారం.