తన కోరిక తీర్చనందుకు వృద్ధురాలిపై ఓ వ్యక్తి కిరాతంగా దాడి చేసి హత్య చేశాడు. ఆపై పశ్చాత్తాపంతో పోలీసులకు లొంగిపోయాడు. ప్రకాశం జిల్లా చీరాలలో ఈ ఘటన జరిగింది. పోలీసులు తెలిపిన వివరాల ప్రకారం.. పట్టణంలోని బందావారివీధిలో కర్నాటి విజయలక్ష్మి (61) అనే వృద్ధురాలు.. భర్త మరణంతో కొన్నాళ్లుగా ఒంటరిగా జీవించింది. తులాబంధు సాంబశివరావు అనే వ్యక్తి.. వృద్ధురాలు ఇంటి సమీపంలోనే నివసిస్తున్నారు. వీరు తరచూ చరవాణిలో మాట్లాడుకుంటుండేవారు.
ఈ క్రమంలో.. గత నెల 11వ తేదీ రాత్రి వృద్ధురాలి ఇంటికి సాంబశివరావు వెళ్లాడు. తన కోరిక తీర్చాలని ఆమెపై ఒత్తిడి తెచ్చాడు. ఆమె అంగీకరించని కారణంగా.. ఇద్దరి మధ్య కొద్దిసేపు వాగ్వాదం జరిగింది. అనంతరం మంచినీళ్లు కావాలని సాంబశివరావు విజయలక్ష్మిని అడిగాడు. ఆమె తెచ్చేందుకు వంట గదిలోకి వెళ్లిన సమయంలో కోపంతో పదే పదే దాడి చేశాడు. తీవ్ర గాయాలతో.. విజయలక్ష్మి స్పృహ తప్పిపడిపోయింది. ఆమెను హతమార్చాలని సాంబశివరావు నిర్ణయించుకున్నాడు. గొంతు నొక్కి ఊపిరాడకుండా చేసి ప్రాణాలు తీశాడు. ఆ తర్వాత ఇంటికి తాళం వేసి అక్కడి నుంచి పరారయ్యాడు.