Fake Visas: అమాయక మహిళలను టార్గెట్ చేసుకుని కువైట్లో ఉద్యోగాలంటూ నమ్మిస్తూ నకిలీ వీసాలు సృష్టిస్తున్న దళారుల నెట్వర్క్ బయటపడింది. గల్ఫ్‌ దేశాల్లోని దళారులతో మాట్లాడుకుని ఇక్కడి నుంచి పర్యాటక, సందర్శకుల వీసాలతో వారిని పంపుతున్నారు. ముంబయి కేంద్రంగా ఓ దళారి ఈ వ్యవహారంలో కీలకపాత్ర పోషిస్తున్నాడు. హైదరాబాద్, బెంగళూరు, దిల్లీ నగరాల్లో సబ్ ఏజెంట్లను ఏర్పాటు చేసుకున్నాడు. ఇలా మూడు నెలల్లో 200 మంది మహిళలను అక్రమంగా కువైట్‌కు పంపించాడని తెలంగాణలోని సైబరాబాద్‌ పోలీసులు గుర్తించారు. హైదరాబాద్‌లోని ఓ ఏజెంట్‌ను అదుపులోకి తీసుకుని ప్రశ్నిస్తున్నారు. ఈ ముఠాకు శంషాబాద్‌ విమానాశ్రయంలో కొందరు సహకరిస్తున్నారని పోలీస్‌ ఉన్నతాధికారి ఒకరు తెలిపారు.
కలర్‌ జెరాక్స్‌లతో బురిడీ
ఘరానా ఏజెంట్లు నకిలీ పేర్లతో మహిళలకు వీసాలు తీసుకుంటున్నారు. పోలీస్‌ క్లియరెన్స్‌ సర్టిఫికెట్లలో పేర్లు మార్చి కలర్‌ జెరాక్స్‌లు తీసి పంపుతున్నారు. ఈ మూడునెలల్లో తూర్పుగోదావరి, కృష్ణా, నల్గొండ, నిజామాబాద్‌, కరీంనగర్‌ జిల్లాలకు చెందిన పలువురు మహిళలను ఇలా తరలించారని పోలీసులు గుర్తించారు. శంషాబాద్‌ విమానాశ్రయంలో విదేశీ వీసాలు, పాస్‌పోర్టులను పరిశీలిస్తున్న ఓ విభాగంలో పనిచేస్తున్న కొందరు ముంబయి, హైదరాబాద్ ఏజెంట్ల నుంచి కమీషన్‌ తీసుకుని సహకరిస్తున్నారని అనుమానిస్తున్నారు. ఈ ముఠా ప్రధాన ఏజెంట్ ముంబయిలో ఉన్నాడని తెలుసుకున్నారు. ప్రస్తుతం అతడు అజ్ఞాతంలోకి వెళ్లినట్లు తెలుస్తోంది. పోలీసులు హైదరాబాద్ ఏజెంట్ల ద్వారా కువైట్‌కు వెళ్లిన మహిళల వివరాలు సేకరిస్తున్నారు.