తెరాస నేత ఈటలకు అన్యాయం జరిగిందంటూ అభిమాని ఆత్మహత్యాయత్నం
తెలంగాణలోని మంచిర్యాల జిల్లా మందమర్రిలో... తెరాస నేత ఈటల రాజేందర్ అభిమాని ఆత్మహత్యాయత్నానికి పాల్పడడం కలకలం సృష్టించింది. భూ కబ్జా ఆరోపణల నేపథ్యంలో.. ఈటలకు అన్యాయం జరిగిందని ఆరోపిస్తూ... మందమర్రి అంగడి బజార్ ప్రాంతానికి చెందిన వెంకటేశ్ ముదిరాజ్ ఈ పని చేశాడు. వెంకటేశ్కు మొదటి నుంచి ఈటల రాజేందర్ అంటే ఎనలేని అభిమానం. ఆయన పేరుపై సేవా కార్యక్రమాలు సైతం నిర్వహించేవాడు.
హైదరాబాద్లో ఉంటూ క్యాటరింగ్ పనులు చేసే వెంకటేశ్ రెండు రోజుల క్రితం మందమర్రికి వచ్చాడు. ఈ క్రమంలో ప్రభుత్వ తీరుపై ఆగ్రహం వ్యక్తం చేస్తూ ఈటల రాజేందర్కు మద్దతుగా ఒంటిపై పెట్రోలు పోసుకొని ఆత్మహత్యాయత్నానికి యత్నించగా స్థానికులు అడ్డుకున్నారు. అనంతరం అటుగా వెళ్తున్న లారీ కిందకు చేరి తన నిరసన తెలిపాడు. ఈ క్రమంలో పోలీసులు అక్కడకు చేరుకుని వెంకటేష్ను అదుపులోకి తీసుకున్నారు.