Mystery revealed: ప్రస్తుత తూర్పుగోదావరి జిల్లా చాగల్లుకు చెందిన పి.శ్రీహర్ష(17) 2018లో వేలివెన్నులోని ఓ కళాశాలలో ఇంటర్‌ చదువుతున్నాడు. అదే ఏడాది దీపావళికి దారవరంలోని తాతయ్య శ్యామ్‌సన్‌ ఇంటికి వచ్చాడు. అంతకుముందు నుంచే క్రికెట్‌లో స్నేహితులైన నిర్మాణ కూలీలు షేక్‌ రషీద్, ఆదిత్య, మునీంద్రలతో కలిసి నిడదవోలు జూనియర్‌ కళాశాలకు ఆడుకొనేందుకు వెళ్లారు. వీరి మధ్య తగాదా నెలకొనడంతో పథకం ప్రకారం శ్రీహర్షను ఆ ముగ్గురూ.. మెడకు తాడు బిగించి హతమర్చారు. శవం కనిపించకుండా కళాశాలలోని వినియోగంలో లేని సెప్టిక్‌ ట్యాంక్‌లో దాచిపెట్టారు. ఏడాది తరువాత 2019లో ఆ ముగ్గురూ కళేబరాన్ని బయటకు తీసి, నిడదవోలు రైల్వే గేటు సమీపంలోని కాలువలో పడేశారు. 2018లోనే శ్రీహర్ష అదృశ్యంపై తండ్రి రత్నకుమార్‌ పోలీసులకు ఫిర్యాదు చేయగా కేసు నమోదు చేశారు.
అప్పటినుంచి అదో మిస్టరీలా మిగిలిపోయింది. కాగా ఇటీవల రషీద్ తాగిన మైకంలో తనతో జాగ్రత్తగా ఉండాలని.. తానో హత్య చేసినట్లు మిత్రులను హెచ్చరించాడు. ఈ విషయం పోలీసులకు తెలిసింది. వారు రషీద్‌ను అదుపులోకి తీసుకొని విచారించగా అసలు సంగతి బయటపడింది. రషీద్‌ను అరెస్టు చేశారు. ఆదిత్య, మునీంద్ర పరారీలో ఉన్నారు. డీఎస్పీ శ్రీనాథ్‌ నిడదవోలు కళాశాలలోని సెప్టిక్‌ ట్యాంక్‌లో మరికొన్ని ఎముకలను గుర్తించారు. ఎస్సై రమేష్‌ దర్యాప్తు చేస్తున్నారు.