నేర సంఘటనల్లో ఆధారాలు.. నేరస్థులు ఉపయోగించిన సిమ్‌కార్డులు.. సీసీ కెమెరాల ఫుటేజీలుంటేనే కొందరు పోలీసులు పరిశోధిస్తున్నారు. ఈ ఆధారాలు లేకపోతే కేసులు నమోదు చేసినా ఎక్కడి గొంగళి అక్కడే అన్నచందంగా ఉంటుంది. ఇక్కడ మాత్రం ఆధారాలు ఉన్నా.. అదేంటో.. నిర్లక్ష్యంగా వ్యవహరిస్తున్నారు. 9 ఏళ్ల క్రితం తన బైక్ దొంగిలించారంటూ బాధితుడు ఫిర్యాదు చేస్తే.. సాక్ష్యాధారాలు లేవంటూ పోలీసులు చేతులెత్తేశారు. ఎంత ప్రయత్నించినా.. ఫలితం లేకపోవటంతో తన బైక్ పోయిందని.. ఇక దొరకదని బాధితుడు నిశ్చయించుకున్నాడు. మళ్లీ ఇప్పుడు.. చోరీకి గురైన బైక్కు సంబంధించిన చలానాలు వరుసగా వస్తోంటే.. ఒకింత ఆశ్చర్యానికి గురైనా.. మళ్లీ తన బైక్ దొరకుతుందని ఆశ చిగురించింది. అదే ఆశతో పోలీసుల దగ్గరికి వెళ్లిన బాధితునికి మాత్రం.. ఆనాటి నిర్లక్ష్యమే మళ్లీ ఎదురైంది.
ప్రాధేయపడినా ఫలితం శూన్యం...
హైదరాబాద్ రామంతాపూర్‌లో నివాసమున్న మాటూరి వికాస్రెడ్డి.. పదేళ్ల క్రితం తన స్నేహితుడు అక్కపల్లి శ్రీనివాస్‌ పేరుతో బైక్ కొన్నాడు. అనంతరం వికాస్రెడ్డి తన కుటుంబంతో సహా మలక్‌పేటకు మారాడు. ఏడాది తర్వాత తన సోదరుడికి ఘట్‌కేసర్‌లోని ఓ ఇంజినీరింగ్‌ కళాశాలలో సీటు రావడంతో రాకపోకలు వీలుంటుందని వికాస్రెడ్డి బైక్‌ను తన సోదరుడికి ఇచ్చేశాడు. కాలేజ్‌కి వెళ్లిన సోదరుడు.. మరుసటి రోజు ఉదయాన్నే క్లాస్కు వెళ్లాల్సి ఉండడంతో రాజీవ్‌గృహకల్పలో ఉంటున్న తన స్నేహితుల గదిలో ఉన్నాడు. ఉదయం లేచి చూసేసరికి బైక్ కనిపించలేదు. వికాస్రెడ్డి ఘట్‌కేసర్‌ ఠాణాలో ఫిర్యాదు చేశాడు. వారం పదిరోజులు హడావుడి చేసిన పోలీసులు తర్వాత వదిలేశారు. అప్పటి నుంచి పోలీసులను ప్రాధేయపడుతున్న వికాస్రెడ్డికి.. ఈనాటికీ ఫలితం ఏమాత్రం కన్పించలేదు.
వరుసగా చలానాలు వచ్చినా.. మారని వరస...
పోలీసుల వైఖరితో బైక్ ఇక దొరకదు అని గట్టిగా నిర్ణయించుకున్న వికాస్రెడ్డికి.. గతేడాది డిసెంబర్లో హైదరాబాద్ ట్రాఫిక్‌ పోలీసులు పంపించిన ఈ-చలాన్ చూసి ఆశ్చర్యం కలిగింది. 8 నెలల క్రితం మొదటిసారి ఈ చలాన్ వచ్చింది. అప్పుడెప్పుడో చోరీకి గురైన బైక్ (ఏపీ11ఎజే6972)పై ఇద్దరు యువకులు శిరస్త్రాణం ధరించకుండా వెళ్తుంటే సీసీ కెమెరా ఫొటో తీసింది. ఆ చలానా తర్వాత మరో రెండు చలానాలు వచ్చాయి. ఈ విషయాన్ని వికాస్రెడ్డి వెంటనే.. ట్రాఫిక్‌ పోలీసుల దృష్టికి తీసుకెళ్లాడు. అది దొంగిలించిన వాహనంగా గుర్తించారు.