హైదరాబాద్ నగరంలో పట్టపగలే దారుణం జరిగింది. తాను పనిచేసే ప్రాంతానికి వెళ్లేందుకు యువతి ఆటో ఎక్కగా, దగ్గరి దారంటూ దారిమళ్లించిన డ్రైవర్.. ఆమెపై అత్యాచారానికి పాల్పడ్డాడు. సంతోష్‌నగర్‌ ఠాణా పరిధిలో బుధవారం జరిగిన ఘటన నగరంలో కలకలం సృష్టించింది.
హైదరాబాద్ సంతోష్‌నగర్‌ పరిధిలో నివసిస్తున్న యువతి (20) మైలార్‌దేవ్‌పల్లిలో ల్యాబ్ టెక్నీషియన్గా పనిచేస్తోంది. అక్కడికి వెళ్లే క్రమంలో బుధవారం మధ్యాహ్నం 2.30గంటల ప్రాంతంలో ఆటో ఎక్కింది. ఆటోను దారి మళ్లించిన డ్రైవర్ ఆమెను నిర్మానుష్య ప్రాంతానికి తీసుకెళ్లి అఘాయిత్యానికి పాల్పడ్డాడు. అపస్మారక స్థితికి చేరిన బాధితురాలిని అక్కడే వదిలేసి వెళ్లిపోయాడు. సాయంత్రం వరకు అక్కడే ఉండిపోయిన ఆమె తర్వాత తేరుకుని పోలీసులకు ఫిర్యాదు చేసింది.
"బాధితురాలు ఇంకా షాక్‌లో ఉన్నందున వివరాలు సక్రమంగా చెప్పలేకపోతోంది. ఆమెపై సామూహిక అత్యాచారం జరిగిందా? ఒక్కడే అఘాయిత్యానికి పాల్పడ్డాడా? అనేది తెలుసుకునేందుకు బాధితురాలిని భరోసా కేంద్రానికి తరలించాం. వైద్య పరీక్షలు నిర్వహిస్తున్నాం. ఆటో డ్రైవర్ కోసం గాలిస్తున్నాం’" అని దక్షిణ మండలం డీసీపీ గజరావ్‌ భూపాల్‌ తెలిపారు.