'పరిశ్రమల్లో 3 నెలలకోసారి మాక్​ డ్రిల్​ నిర్వహించాలి'

పరిశ్రమల యాజమాన్యాలు ఎల్లప్పుడూ పూర్తిస్థాయి అప్రమత్తంగా వ్యవహరించాలని విశాఖ జిల్లా కలెక్టర్​ వినయ్​చంద్​ ఆదేశించారు. మూడు నెలలకోసారి మాక్​ డ్రిల్​ నిర్వహించాలని అన్నారు. పరిశ్రమల్లో ఓ సీనియర్​ అధికారితో నిరంతరం పర్యవేక్షణ ఉండాలన్నారు. కరోనా వ్యాప్తి నేపథ్యంలో పరిశ్రమల్లో సిబ్బందికి మాస్కులు, శానిటైజర్లు అందుబాటులో ఉంచాలన్నారు.

పరిశ్రమల్లో మూడు నెలలకు ఒకసారి మాక్ డ్రిల్ నిర్వహించాలని విశాఖ జిల్లా కలెక్టర్ వి.వినయ్​చంద్ పరిశ్రమల యాజమాన్యాలను ఆదేశించారు. జిల్లాలోని వివిధ ఆయిల్, పెట్రో కెమికల్స్, కెమికల్స్​ వంటి ప్రమాదకర పరిశ్రమల నిర్వహణ, భదతా ప్రమాణాల, కోవిడ్ - 19 నివారణ చర్యలపై ఆయన.. పరిశ్రమల యాజమాన్యాలతో సమీక్షించారు. ఈ సమావేశానికి జీవీఎంసీ కమిషనర్​ జి.సృజన, పరిశ్రమల జిల్లా అధికారి ప్రసాద్​, కాలుష్య నియంత్రణ అధికారి, వివిధ పరిశ్రమల ప్రతినిధులు హాజరయ్యారు. కరోనా వ్యాప్తి నేపథ్యంలో పరిశ్రమల వద్ద థర్మల్​ స్కానర్లు, శానిటైజర్లు అందుబాటులో ఉంచాలని.. సిబ్బంది అంతా మాస్కులు ధరించి.. భౌతిక దూరం పాటించాలని సూచించారు.

కంపెనీల యాజమాన్యాలు పరిశ్రమల్లో ఉపయోగించే రసాయనాలు, పెట్రో కెమికల్ ఉత్పత్తులు, ముడి పదార్థాలు, వాటి స్టోరేజి, రవాణాలో తగిన జాగ్రత్తలు తప్పనిసరని కలెక్టర్​ సూచించారు. సాంకేతిక, నైపుణ్యత కలిగిన సిబ్బంది పరిశ్రమల్లో అనుకోని ప్రమాదాలు జరిగినప్పుడు పూర్తిస్థాయిలో అప్రమత్తంగా ఉండాలన్నారు. నిరంతర పర్యవేక్షణకు అవగాహన కలిగిన ఓ సీనియర్​ అధికారిని నియమించాలని స్పష్టం చేశారు. రెవెన్యూ, పోలీసు, జీవీఎంసీ, వైద్యారోగ్య శాఖ, తదితర శాఖల నుంచి ఎలాంటి సహకారం అవసరమో స్పష్టంగా తెలియజేయాలన్నారు.

ఇదీ చూడండి..:సీమెన్​ ఉద్యోగాలు అన్నాడు... లక్షలు కాజేశాడు