గంజాయి వినియోగిస్తున్నట్టు తేలితే కేసులే: విశాఖ సీపీ

గంజాయికి యువత బానిసలుగా మారడంపై విశాఖ పోలీసులు ప్రత్యేకంగా దృష్టి సారించారు. గంజాయి వినియోగదారులను గుర్తించి కఠినంగా శిక్షించేందుకు చర్యలు చేపట్టారు. గంజాయి వినియోగిస్తున్నట్టు తేలితే ఉపేక్షించమని సీపీ మనీష్​కుమార్​సిన్తా హెచ్చరించారు.

గంజాయిని ఇష్టారాజ్యంగా వినియోగిస్తూ మత్తుకు బానిసలుగా మారుతున్న వారిపై ఉక్కుపాదం మోపాలని విశాఖ సీపీ మనీశ్‌కుమార్‌సిన్హా నిర్ణయించారు. ఆమేరకు విశాఖ నగర కమిషనరేట్‌ పరిధిలోని అన్ని పోలీసుస్టేషన్ల సీఐలు, ఏసీపీలకు, ఏడీసీపీలకు, స్పెషల్‌ ఎన్ఫోర్స్‌మెంట్‌ బ్యూరో(సెబ్‌) అధికారులకు ఇటీవలే ఆదేశాలు జారీ చేశారు. గంజాయి అక్రమ రవాణా, వినియోగానికి అడ్డుకట్ట వేయడానికి వీలుగా పోలీసులు వ్యూహం మార్చారు. కేవలం గంజాయిని అక్రమంగా రవాణా చేస్తున్నవారితోపాటు గంజాయిని కొద్దిమొత్తాల్లో వినియోగిస్తున్నవారిని కూడా గుర్తించాలని నిర్ణయించారు. గంజాయిని కొద్దిమొత్తంలో కలిగిఉండడం కూడా నేరమేనన్న విషయం తెలిసిందే. గంజాయికి అలవాటుపడ్డవారు ఎంతో కొంత పరిమాణంలో భద్రపరుచుకుంటుంటారు. గంజాయిని పీల్చేటప్పుడైనా కొంతమొత్తం వారి దగ్గర దొరుకుతుంది. గతంలో ఎక్కువ పరిమాణంలో రవాణా చేసేవారిపైనే ప్రధానంగా దృష్టిసారించిన పోలీసులు తాజాగా వినియోగదారులపైనా నిఘా పెట్టారు.

నగరంలోని ప్రాంతాల్లో నిఘా:

గంజాయి తాగుతూ పట్టుబడితే తలెత్తే ఇబ్బందులను దృష్టిలో ఉంచుకుని పలువురు నిర్జన ప్రదేశాలకు వెళ్లి గంజాయిని పీలుస్తుంటారు. నగరంలోని బస్టాండు, రైల్వేస్టేషన్లు, ఫ్లైవోవర్‌ బ్రిడ్జి కిందభాగంలోనూ, బీచ్‌రోడ్డులోని కొన్ని దుకాణాల వద్దా, పార్కుల్లో పొదల మాటున ఉండి కూడా కొందరు గంజాయిని తాగుతుంటారు. దీన్ని దృష్టిలో ఉంచుకుని పలువురిపై దాడులు చేయడం మొదలుపెట్టారు. దీంతోపాటు కొనుగోలుదారులకు గంజాయిని సరఫరా చేసే ముఠాల సంఖ్యకు కూడా నగరంలో ఏమాత్రం కొదవలేదు. ఆయా విక్రయాదారులపైనా పోలీసులు నిఘా పెట్టారు.

ఆంధ్రవిశ్వవిద్యాలయంలో పట్టుబడ్డ ఆరుగురు నిందితులు:

ఆంధ్రవిశ్వవిద్యాలయంలోని ఇంజినీరింగ్‌ కళాశాల న్యూక్లాస్‌రూం బిల్డింగ్‌ సమీపంలో కొందరు గంజాయి తాగుతున్నట్లు మూడోపట్టణ పోలీసులకు సమాచారం రావడంతో మంగళవారం రాత్రి తనిఖీలు నిర్వహించారు. ఆరుగురు నిందితులు ఒకచోట కూర్చొని క్యాంప్‌ఫైర్‌ తరహాలో మంట వెలిగించుకుని దాని చుట్టూ కూర్చొని గంజాయి తాగుతున్నట్లు గుర్తించి వారిని అదుపులోకి తీసుకున్నారు. వారి గురించి ఆరా తీయగా దువ్వాడకు చెందిన రౌడీషీటర్‌ దాకమర్రి దుర్గారావు అలియాస్‌ ఏటీఎం అనే వ్యక్తి వారి బృందంలో ఉన్నట్లు నిర్ధరణ అయ్యింది. ముత్యాల కార్తీక్, తలాడ తిరుమలరావు, బానోతు శివ, మజ్జివిజయకుమార్, రొయ్యి మోసయ్యబాబు తదితరులున్నట్లు తేలింది. వారిపై కేసు నమోదు చేసి న్యాయస్థానంలో హాజరుపరచగా వారికి 14రోజుల రిమాండు విధించారు. దీంతో వారందరినీ జైలుకు పంపారు. ఆంధ్రవిశ్వవిద్యాలయంలో ఇటీవల భద్రత కట్టుదిట్టం చేసినప్పటికీ సంబంధం లేని వ్యక్తులు విశ్వవిద్యాలయ ప్రాంగణంలో గంజాయి పీలుస్తూ పట్టుబడడం గమనార్హం.

రైల్వేన్యూకోలనీలో మరో ముగ్గురు:

రెండోపట్టణ పోలీసుస్టేషన్‌ పరిధిలోని రైల్వేక్వార్టర్ల పరిసరాల్లో ముగ్గురు గంజాయి పీలుస్తున్నట్లు వచ్చిన సమాచారం మేరకు పోలీసులు దాడులు చేయగా ముగ్గురు పట్టబడ్డారు. నిందితులు నక్కా నవీన్, చిన్నా, కొత్తపల్లి రామకృష్ణలపై కేసు నమోదు చేసి న్యాయస్థానంలో ప్రవేశపెట్టగా వారికి వచ్చే నెల మూడో తేదీ వరకు వరకు రిమాండు పడింది.

గంజాయి తాగుతున్నవారితో స్నేహం:

ద్వారకానగర్‌ ప్రాంతంలో పోలీసులు దాడులు నిర్వహించగా తొమ్మిది మంది పట్టుబడ్డారు. వారిలో ఇద్దరిని అరెస్ట్‌ చేశారు. మిగిలిన ఏడుగురు వారితోపాటే ఉన్నప్పటికీ గంజాయి తాగకపోవడంతో వదిలేశారు. ఆ ఏడుగురి తల్లితండ్రులను కూడా పోలీసులు కౌన్సెలింగ్‌ చేశారు.

నగర పోలీసు కమిషనర్‌ పరిధిలో కొంతమంది యువకులు గంజాయికి బానిసలవుతున్నట్లు ఫిర్యాదులు అందుతున్నాయి. దీనిపై పోలీసు అధికారులను అప్రమత్తం చేశాం. పట్టుబడ్డారంటే కేసులు, జైలు తప్పవన్న విషయాన్ని గుర్తుంచుకోవాలి. మాదకద్రవ్యాలకు బానిసలుగా మారడం అత్యంత ప్రమాదకరం. విద్యార్థులకు చదువులు దెబ్బతినడమే కాకుండా గంజాయి తాగితే తీవ్రమైన అనారోగ్యాల్ని కూడా ఎదుర్కోవాల్సి వస్తుంది. తల్లిదండ్రులు కూడా వారి పిల్లల అలవాట్లను జాగ్రత్తగా గమనిస్తుండాలి. గంజాయి వినియోగిస్తున్నట్లు తేలితే కఠిన చర్యలు తప్పవు - మనీశ్‌కుమార్‌ సిన్హా

ఇదీ చదవండి:వాయిస్ మెసేజ్ పెట్టి.. ఆత్మహత్య చేసుకున్నాడు!