విశాఖ ఉక్కు, ప్రభుత్వరంగ సంస్థల ప్రైవేటీకరణ, కార్మిక, రైతు వ్యతిరేక చట్టాలు రద్దు చేయాలంటూ రైతులు, కార్మికులు శంఖారావం పూరించారు. విశాఖ వేదికగా జరిగిన ఈ సభకు జాతీయ రైతు సంఘం నాయకుడు రాకేష్ సింగ్ టికాయత్, ఆల్ ఇండియా కిసాన్ సభ జాతీయ నాయకుడు అశోక్ దావల, మాజీమంత్రి వడ్డే శోభనాద్రీశ్వరరావుతోపాటు.. స్టీల్ప్లాంట్ కార్మిక సంఘాల నాయకులు హాజరయ్యారు. రాకేశ్‌ టికాయత్ శంఖం ఊది సభను ప్రారంభించారు. జోరువానలోనూ సభను కొనసాగించారు. ప్రైవేటీకరణను అడ్డుకోవడానికి ఎంతవరకైనా పోరాడాలని కార్మికులకు టికాయత్ పిలుపునిచ్చారు.
ప్రజల సంపదైన ప్రభుత్వ రంగ సంస్థల ప్రైవేటీకరణను.. ఎట్టి పరిస్థితుల్లోనూ అంగీకరించబోమని వడ్డే శోభనాద్రీశ్వరరావు స్పష్టం చేశారు. ప్రభుత్వ రంగ సంస్థల ప్రైవేటీకరణ, కొత్త సాగు చట్టాలకు ప్రజామోదం లేదన్నారు. అయినా ముందుకెళ్లాలనుకుంటే..పార్లమెంట్‌ను రద్దు చేసి ఎన్నికలకు వెళ్లాలని మోదీకి సూచించారు.
ప్రభుత్వరంగ సంస్థలను అమ్మడం తప్పితే.. కొత్త కర్మాగారాలు ఏం తెచ్చారని ఆలిండియా కిసాన్ సభ నాయకులు కేంద్ర ప్రభుత్వాన్ని ప్రశ్నించారు. భాజపా ప్రభుత్వం నీరు నింగి నేలను కూడా అమ్మేస్తోందని విమర్శించారు. విశాఖ స్టీల్ ప్లాంట్ను అమ్మేస్తామంటే కార్మిక లోకం చూస్తూ ఉరుకోబోదని..దిల్లీలో రైతు ఉద్యమం తరహాలో విశాఖ స్టీల్ ప్లాంట్ పరిరక్షణ కోసం పోరాటం జరుగుతుందని చెప్పారు. కేంద్ర అప్రజాస్వామిక విధానాలకు వ్యతిరేకంగా గాంధీ, సుభాష్ చంద్రబోస్, భగత్ సింగ్ స్ఫూర్తితో ముందుకెళ్దామని కిసాన్ సభ నాయకులు పిలుపునిచ్చారు. విశాఖ ఉక్కుకు సొంత గనులు ఇవ్వాలని అడిగినా ఇవ్వడం లేదని స్టీల్ ప్లాంట్ కార్మిక సంఘం నేతలు ఆవేదన వ్యక్తం చేశారు. కన్న తల్లి లాంటి స్టీల్ప్లాంట్ అమ్మేస్తామంటే ఊరుకోబోమని తేల్చిచెప్పారు.