విశాఖ జిల్లా నుంచి తూర్పు కనుమల మీదగా ఒడిశా, మహారాష్ట్ర, ఛత్తీస్‌గఢ్, తెలంగాణకు వెళ్లే అంతర్రాష్ట్ర రహదారి అది. ఐదు దశాబ్దాల కిందట వేసిన ఈ రోడ్డు ఇప్పటికీ విస్తరణకు నోచుకోలేదు. ఈ రహదారిలో ఎదురుగా వాహనం వ‌స్తే పక్కకు తప్పుకోవడం చాలా కష్టం. దీనికి తోడు రోడ్డుపైన గుంతలు వాహనదారులకు ప్రాణసంకటంగా మారుతున్నాయి.
విశాఖ జిల్లా ఆర్.వి. న‌గ‌ర్ నుంచి తూర్పుగోదావరి జిల్లా పాలగడ్డ వరకు 73 కిలోమీటర్ల రహదారి ప్రయాణానికి 5 గంటలకు పైగా సమయం పడుతోంది. పర్యాటకంగా అభివృద్ధి చెందుతున్న ఈ ప్రాంతం నిత్యం వందల వాహనాలతో కిటకిటలాడుతోంది. ర‌హ‌దారికి ఇరువైపులా ఉన్న రక్షణ గోడ‌లు సైతం దెబ్బతిన్నాయి. గోతుల మయమైన రోడ్డుపై ప్రయాణమంటేనే వాహనదారులు భయపడుతున్నారు.
సీలేరు నుంచి ఈ రోడ్డును 2 వ‌రుస‌ల ర‌హ‌దారిగా విభ‌జించి అభివృద్ధి చేసేందుకు 84 కోట్లతో టెండర్ల ప్రక్రియ 2018 నవంబరులో పూర్తి చేశారు. కానీ ఈ ప్రాంతమంతా రిజర్వ్‌ ఫారెస్ట్‌ కావడం వల్ల.. అటవీ శాఖ అభ్యంతరాలతో కొంత కాలం పనులు నిలిచిపోయాయి. కేంద్ర పర్యావరణ శాఖ అనుమతులిచ్చినా.. పనులు ముందుకు సాగడం లేదని స్థానిక నేతలు ఆవేదన వ్యక్తం చేస్తున్నారు.