కర్ణుడికి కవచకుండలాలు మాదిరి ప్రతి ఒక్కరి ముఖానికి మాస్క్, చేతిలో శానిటైజర్‌ బాటిల్‌. అవసరం ఏదైనా... అడుగుపెట్టే ప్రదేశం ఎలాంటిదైనా... మాస్క్ ఉంటేనే ఇంటి నుంచి కాలు బయటపెట్టేవారు. చివరకు... ఇంట్లో ఉన్నా మాస్క్ ధరించే పరిస్థితి. ఇదంతా సరిగ్గా ఏడాది కిందటి మాట. ఎక్కడ చూసినా...ఎవరిని చూసినా...మాస్క్‌లే దర్శనం ఇచ్చేవి. కనీవినీ ఎరుగని రీతిలో యావత్తు ప్రపంచం మాస్క్ అనే ముసుగు ధరించింది. కాలచక్రం గిర్రున తిరిగి 2020 నుంచి 2021లోకి రాగానే...పరిస్థితులు ఒక్కసారిగా మారిపోయాయి. మహమ్మారి సమస్య గతంలో మాదిరి వెంటాడుతూనే ఉన్నా...ప్రజలు మాత్రం మాస్క్ ధరించేందుకు ససేమిరా అంటున్నారు.
ఆ సంగతే మరిచారు..
దేశవ్యాప్తంగా మళ్లీ కరోనా కేసులు విజృంభిస్తున్నా...ఏ మాత్రం ఆందోళన, అప్రమత్తత లేకుండా జీవనం సాగిస్తున్నారు...ప్రజలు. ప్రపంచంపై పగపట్టిన విధంగా మళ్లీ మళ్లీ వ్యాప్తి చెందుతున్న కరోనా మహమ్మారిని కట్టడి చేసేందుకు ప్రధాన ఆయుధం..మాస్క్. అత్యంత కీలకమైన ఈ అస్త్రం లేకుండానే కొవిడ్ 19కు ఎదురెళ్లే సాహసం చేస్తున్నారు....దేశ ప్రజలు. కరోనా నుంచి దేశాన్ని కాపాడేందుకు విధించిన లాక్‌డౌన్‌కు ఇటీవలే ఏడాది పూర్తైంది. కొద్ది నెలలుగా అన్ని కార్యకలాపాలు యథావిథిగా సాగుతున్నా.. ఇంకా మహమ్మారి బెడద తొలగిపోలేదు. పూర్తిగా కొవిడ్ విషవలయం నుంచి బయటపడలేదు. కానీ ప్రజలు మాత్రం కరోనా వైరస్ అనేది ఒకటి ఉందనే విషయాన్నే మరిచిపోయిన రీతిలో..నిబంధనలకు విరుద్ధంగా నడుచుకుంటున్నారు. కనీసం మాస్క్ ధరించేందుకు సైతం విముఖత చూపుతున్నారు.
వారితో ప్రమాదమే!
వైరస్ వ్యాప్తి ప్రారంభమైనప్పటి నుంచి సుమారు పది నెలలపాటు అంతా విధిగా మాస్క్ ధరించారు. గత రెండు నెలలుగా మాత్రం చాలా మంది మాస్క్‌ను పక్కన పెట్టి...మహమ్మారికి మళ్లీ స్వాగతం పలికేలా నిర్లక్ష్యంగా వ్యవహరిస్తున్నారు. దీనికి ప్రధాన కారణం కేసులు భారీగా తగ్గడమే. అయితే పాజిటివ్‌ కేసులు తక్కువ నమోదవుతున్నాయే తప్ప...పూర్తిగా తగ్గలేదని వైద్యులు హెచ్చరిస్తున్నారు. కొంతమంది వైరస్ బారినపడినప్పటికీ...వారిలో ఉండే వ్యాధి నిరోధక శక్తి వల్ల లక్షణాలు కనిపించకుండా వుండే అవకాశముంది. అటువంటి వారితో మాస్క్ లేకుండా మాట్లాడడం, చేతులు కలపడం వల్ల ఇతరులు వైరస్ బారినపడే ప్రమాదముంది. ఈ విషయాన్ని ఎవరూ గుర్తించటం లేదు.
అలసత్వపు ధోరణి..
బహిరంగ ప్రదేశాల్లో తప్పనిసరిగా మాస్క్ ధరించడం వల్ల వైరస్ నుంచి మనల్ని మనం రక్షించుకునేందుకు అవకాశముంది. అయితే చాలామంది ఈ విషయంపై ఎలాంటి శ్రద్ధ చూపటం లేదు. బస్సులు, ఆటోల్లో మాస్క్ ధరించకుండా ప్రయాణాలు సాగిస్తున్నారు. ఒక ఊరి నుంచి మరొక ఊరికి వాహనాల్లో ప్రయాణించేటప్పుడు వేర్వేరు ప్రాంతాలకు చెందిన వారితో దగ్గరగా మసలేందుకు ఆస్కారం ఉంది. అటువంటి సమయంలో వారి ముక్కు, నోటి నుంచి వెలువడే తుంపర్ల ద్వారా వైరస్ సోకవచ్చు. అదే మాస్క్ ధరించినట్టయితే ఈ విధంగా వ్యాప్తి చెందే వైరస్‌కు అడ్డుకట్ట వేసేందుకు అవకాశం ఉంటుంది. అవగాహన ఉన్నా...ఈ అంశంపై ఎవరూ ఆసక్తి చూపటం లేదు. ఇంకెక్కడి కరోనా అనే అలసత్వపు ధోరణితో.. మళ్లీ మహమ్మారి వ్యాప్తికి కారణవుతున్నారు.