విశాఖ మహా ప్రాంత అభివృద్ధి సంస్థ (వీఎంఆర్డీఏ)కు ప్రజల నుంచి వచ్చిన అభ్యంతరాల్లో ఎక్కువగా రహదారుల గురించే వచ్చాయి. కొందరు భూ వినియోగాలను మార్చాలని, మరికొందరు గ్రీన్‌బెల్ట్‌ తొలగించాలని కోరారు. వీఎంఆర్డీఏ తయారుచేసిన బృహత్తర ప్రణాళిక ముసాయిదాలో.. ఆనందపురం మండలంలోని గంభీరం, వేములవలస ప్రాంతాలను గ్రీన్‌బెల్ట్‌లో పెట్టడం, ప్రైవేటు స్థలాలను ప్రభుత్వ అవసరాలకు వినియోగించడం కోసం ప్రతిపాదించారు. భీమిలి, భోగాపురం మండలాల్లో ఎక్కడికక్కడ నూతన మాస్టర్‌ప్లాన్‌ రోడ్లను చూపించారు. నగరంలోని రక్షిత అడవిలో రహదారి, జలవనరుల మీదుగా కొన్ని రోడ్లు వెళ్లేలా ప్లాన్‌ చేశారు. ప్రైవేటు భూములను ప్రజారవాణా ప్రాంతాలుగా పేర్కొన్నారు. చాలాచోట్ల వ్యవసాయ భూములను వ్యవసాయేతరగా, నివాస ప్రాంతాలను గ్రీన్‌బెల్ట్‌లోకి ప్రతిపాదించారు. వీటిపై ప్రజల నుంచి అధిక సంఖ్యలో అభ్యంతరాలు వచ్చాయి.
దళారుల అక్రమ వసూళ్లు..
వీఎంఆర్డీఏ బృహత్తర ప్రణాళిక ద్వారా ప్రజలు పడుతున్న ఇబ్బందులను పరిష్కరిస్తామని కొందరు మధ్యవర్తులు మభ్యపెడుతున్నారు. స్థలాలు, ఇళ్లు, పొలాలు పోతాయని భయాందోళనకు గురి చేస్తున్నారు. ఇళ్లు, పొలాల మీదుగా వెళ్తున్న ప్రతిపాదిత రోడ్లను అధికారులకు డబ్బులిచ్చి తొలగిస్తామని అందుకు కొంత ఖర్చు అవుతుందని వసూళ్లకు పాల్పడుతున్నారు. ప్రణాళిక ముసాయిదాపై అంతగా అవగాహన లేని ప్రజలకు మాయమాటలు చెప్పి తక్కువ ధరకు దక్కించుకునేలా ప్రణాళిక చేస్తున్నారు. ఈ క్రమంలో భీమిలి, భోగాపురం సరిహద్దు ప్రాంతాల్లోని రైతుల నుంచి తక్కువ ధరకు భూములు కొనుగోలు చేస్తున్నారనే ఆరోపణలు వస్తున్నాయి.