విశాఖ గాజువాక శ్రీనగర్‌లో బాలిక హత్య అందరినీ నివ్వెరపోయేలా చేసింది. ప్రేమ పేరుతో ఓ యువకుడు పెంచుకున్న ద్వేషం.. ఓ నిండు ప్రాణాన్ని బలిగొంది. తాను ఇష్టపడుతున్న అమ్మాయి నిర్లక్ష్యం చేస్తూ వేరొకరితో చనువుగా ఉంటోందని కసి పెంచుకొని.. పథకం ప్రకారమే యువతిని అఖిల్‌ హత్యచేసినట్లు గాజువాక పోలీసులు నిర్ధరించారు. ఆదివారం బాలిక కుటుంబీకులను సీపీ మనీష్‌ కుమార్‌ సిన్హా పరామర్శించారు.
శనివారం రాత్రి బాలిక కుటుంబీకులు ఓ శుభకార్యంలో ఉండగా అఖిల్‌ ఆమెకు ఫోన్‌ చేసిన సాయిబాబా గుడి సమీపంలోని కొండపైకి రమ్మని పిలిచినట్లు పోలీసులు తెలిపారు. నాలుగైదు సార్లు ఫోన్‌ చేసి ఒత్తిడి చేయడంతో బాలిక కాదనలేకపోయినట్లు చెప్పారు. ఆమె అక్కడకి రాగానే.. రామ్‌తో ఎందుకు చనువుగా ఉంటున్నావని ప్రశ్నించి... ఒక్కసారిగా బాలిక మెడను పట్టుకుని బ్లేడుతో గొంతుకోసినట్లు నిందితుడు అంగీకరించాడని వెల్లడించారు. ఆ సమయంలో అఖిల్‌ చేతివేళ్లకూ గాయాలయ్యాయని.. ఆ తర్వాత ఆమెను కొండ కిందకు లాక్కొచ్చి వదిలేశాడని పోలీసులు వివరించారు. ఘటనాస్థలిలో ఆధారాలు దొరక్కుండా కారంపొడి చల్లాడని తెలిపారు. ఘటనా స్థలంలో క్షుద్రపూజలు జరిగినట్లు వాతావరణం సృష్టించి.. కేసును తప్పుదోవ పట్టించే ప్రయత్నం చేసినట్లు పేర్కొన్నారు.