విశాఖలో వైకాపా సోషల్ మీడియా కార్యకర్తల ఆత్మీయ సమ్మేళనంలో విజయసాయి రెడ్డి చేసిన వ్యాఖ్యలపై మాజీ మంత్రి బండారు సత్యనారాయణ మూర్తి ఆగ్రహం వ్యక్తం చేశారు. వైకాపా కార్యకర్తలకు ఉద్యోగాలు కట్టబెడతానని ఎంపీ విజయసాయి అనడం దారుణమని అన్నారు. పరవాడ ఫార్మా సిటీలోని పరిశ్రమల్లో వైకాపా సోషల్ మీడియా కార్యకర్తలకు 2 వేల ఉద్యోగాలు ఇస్తానని ఎంపీ చెప్పడం స్థానికులకు ద్రోహం చేయడమేనని స్పష్టం చేశారు.
విశాఖలో ఫార్మా సిటీ నిర్మాణ సమయంలో భూములు కోల్పోయిన వారికి ఉపాధి అవకాశాలు కల్పించాలని డిమాండ్ చేశారు. అడ్డగోలుగా ఉద్యోగాలు ఇస్తామంటే ఉద్యమం చేస్తామని చెప్పారు. స్థానికేతరులకు ఆదరిస్తూ విశాఖ వాసుల నోటిలో మట్టికొట్టే పని చేయకూడదని బండారు చెప్పారు.