విశాఖలో పాఠశాలలు, కళాశాలల విద్యార్థులకు డ్రగ్స్ అమ్ముతున్న ముఠాను పోలీసులు పట్టుకున్నారు. మొత్తం ఐదుగురిని అరెస్టు చేసిన పోలీసులు.. 27 మత్తు పదార్థ పొట్లాలు స్వాధీనం చేసుకున్నారు. కరెన్సీని బిట్ కాయిన్లుగా మార్చి అంతర్జాలం ద్వారా ఎల్ఎస్డీ అనే మత్తు పదార్థాన్ని ప్రధాన నిందితుడు అరవింద్‌ కొనుగోలు చేసినట్లు పోలీసులు వెల్లడించారు. 4 వందల రూపాయలకు కొనుగోలు చేసి, మిగిలిన నిందితులకు వెయ్యికి విక్రయిస్తుంటాడని తెలిపారు.
వారు 2 వేల రూపాయల చొప్పున విద్యార్థులకు అమ్ముతారన్నారు. 16 నుంచి 21 సంవత్సరాల మధ్య వయసువారే ఎక్కువగా డ్రగ్స్ తీసుకుంటున్నట్లు తెలుస్తోందని.. సీపీ మనీష్ కుమార్ సిన్హా ఆందోళన వ్యక్తం చేశారు. ఆంధ్ర విశ్వవిద్యాలయం సహా పలు ప్రైవేటు వర్సిటీలు, జాతీయస్థాయి విద్యాసంస్థలకు నిలయంగా ఉన్న విశాఖలో.. డ్రగ్స్ చలామణీ ఆందోళన రేపుతోంది. ప్రస్తుతం పోలీసులు అరెస్టు చేసిన యువకులు ప్రముఖ విద్యాసంస్థల్లో చదువుకున్న వారు కావడమే ఇందుకు నిదర్శనం. విద్యార్థులుగా ఉన్నపుడే మత్తుకు బానిసలైన వారు.. ఇప్పుడు డ్రగ్స్ సరఫరా చేసే స్థాయికి చేరుకున్నారు.