విశాఖ నగర నడిబొడ్డున 45 చదరపు కిలోమీటర్ల మేర 400 కోట్ల రూపాయలతో ఏషియన్‌ డెవలప్‌మెంట్‌ బ్యాంకు నిధులతో 24 గంటలు తాగునీటి సరఫరా చేసేందుకు పనులు చేపడుతున్నారు. 2018లో మొదలైన ఈ పనులు ప్రస్తుతం 60 శాతం పూర్తయ్యాయి. కుళాయి నీటికి విరామమనేదే లేకుండా..ఇంటింటా శుద్ధినీటిని ఇవ్వాలనేది ఈ ప్రాజెక్టు లక్ష్యం. దశలవారీ 2వేల ఇళ్లకు పూర్తిస్థాయిలో కనెక్షన్లు ఇచ్చారు.
పాత పైపులైన్ల వ్యవస్థలో 40 శాతం నీరు వృథా అయ్యేది. కొత్తపైపులైను వ్యవస్థను వేయడంతోపాటు..సరఫరా నాణ్యతను పర్యవేక్షిస్తున్నారు. ప్రస్తుతం సగటున 1.11 శాతం మాత్రమే నీటినష్టం కనిపిస్తోంది. ప్రస్తుతం ఈ మొత్తం వ్యవస్థను మాధవధార వుడాకాలనీ ఫేజ్‌-1, మర్రిపాలెం వుడాకాలనీ, కరాస, శివానగర్, ఎఫ్సీఐ కాలనీ, రాణాప్రతాప్‌నగర్‌ ప్రాంతాలకు అనుసంధానించి పరిశీలనలు చేస్తున్నారు. మరో నెలరోజుల్లో ఇంకో 2 వేల ఇళ్లకు అదనంగా అనుసంధానించనున్నారు. పైపులైను వ్యవస్థ ఉన్నచోటల్లా అడ్వాన్స్డ్‌ మీటర్‌ ఇన్‌ఫ్రాస్ట్రక్చర్‌ వ్యవస్థను తెచ్చారు. దీంతో నీటిసరఫరా ఎలా ఉంటోంది, ఎక్కడ లోపాలున్నాయనేది ప్రతీ గంటకీ స్కాడా కంట్రోల్‌రూమ్‌కి సంకేతాలు అందిలా సాంకేతికత ఏర్పాటు చేశారు.