కొవిడ్ కారణంగా గడచిన 7 నెలలుగా ప్రభుత్వం అందించే పౌరసేవలన్నీ ప్రభావితమయ్యాయి. క్షేత్రస్థాయి నుంచీ రాష్ట్ర సచివాలయం వరకూ అరకొరగానే సేవలు అందించాల్సిన పరిస్థితే ఇంకా ఉంది. వాణిజ్య పన్నులు, విద్యుత్ బిల్లులు, పురపాలికలు, గ్రామ పంచాయితీల పన్నులు, ప్రజలకు జారీచేసే ధ్రువపత్రాల ఛార్జీలు తదితర వసూళ్లు పూర్తిస్థాయిలో జరగట్లేదు. ప్రజలకు పౌరసేవలూ దూరం కావటంతో ప్రభుత్వ ఆదాయం గణనీయంగా తగ్గింది. ప్రత్యేకించి స్టాంపులు, రిజిస్ట్రేషన్ల ఆదాయం 76.81 శాతం పడిపోయింది. 2019-20 ఆర్ధిక సంవత్సరానికి రిజిస్ట్రేషన్ల శాఖ ఆదాయం 740 కోట్ల రూపాయలు ఉంటే..ఈ ఏడాది మేలో అది కేవలం 171.63 కోట్లు మాత్రమే ఆగిపోయింది. చాలా కార్యాలయాలు కట్టడి జోన్లలో ఉండటం, సిబ్బందికీ కరోనా సోకటం వంటి కారణాలతో ప్రజాసేవల కోసం ఎక్కువ మంది రావట్లేదు. ఈ ఏడాది ఏప్రిల్ 1 నుంచి సెప్టెంబరు 9 వరకూ రాష్ట్రవ్యాప్తంగా 5 లక్షల 49 వేల 871 రిజిస్ట్రేషన్లు జరిగాయి. ఏడాదిలో 2 వేల 700 కోట్ల రూపాయల మేర ఆదాయం సమకూరుతుందని భావించినా..లక్ష్యంలో 67శాతం మాత్రమే సాధిస్తామని రిజిస్ట్రేషన్లశాఖ అంచనా వేస్తోంది.
కొవిడ్ నేపథ్యంలో ప్రభుత్వ కార్యాలయాల్లో ఇ-దస్త్రాల వినియోగం పెరగడంతో... ప్రజలకు నేరుగా అందించాల్సిన ధ్రువపత్రాల జారీ ఆలస్యమవుతోంది. మొత్తం 548 పౌర సేవల్ని గ్రామ సచివాలయాల ద్వారానే అందిస్తామని ప్రభుత్వం చెబుతున్నప్పటికీ .. వస్తున్న ధరఖాస్తులు పరిమితంగానే ఉంటున్నాయి. యూజర్ ఛార్జీల పేరిట రావాల్సిన ఆదాయమూ గణనీయంగా తగ్గింది. కొవిడ్‌తో సిబ్బంది గైర్హాజరు, కార్యాలయాల మూసివేత కారణాలతో పరిష్కరించాల్సిన దస్త్రాలూ పేరుకుపోతున్నాయి. మొత్తం ఇ-దస్త్రాల సంఖ్య లక్ష 12 వేల 505 ఉంటే... గడచిన 15రోజుల్లో కేవలం 28వేల 111దస్త్రాలే పరిష్కారమయ్యాయి. రాష్ట్రస్థాయిలో విభాగాధిపతులు ద్వారా పరిష్కారమైన ఇ-ఫైల్స్‌ సంఖ్య కేవలం 19మాత్రమే. స్పందన కార్యక్రమంలోనూ విజ్ఞప్తులు పెరుగుతున్నాయి. రాష్ట్రవ్యాప్తంగా వివిధ ప్రభుత్వ శాఖలు, కార్పొరేషన్లు, సంస్థలకు సంబంధించి 49 లక్షల 80 వేల ఫిర్యాదులు ఇప్పటి వరకూ అందినట్టు ప్రభుత్వం చెబుతోంది. అత్యధికంగా పౌరసరఫరాల శాఖలో రేషన్‌ కార్డులు మంజూరు కోరుతూ 23 లక్షల దరఖాస్తులు వచ్చాయని తెలిపింది. తరువాతి స్థానంలో 7 లక్షల 61 వేల దరఖాస్తుతో భూపరిపాలనశాఖ ఉండగా..2 లక్షల 33 వేలకుపైగా దరఖాస్తులతో పురపాలకశాఖ నిలిచింది.