ఓబుళాపురం గనుల కేసులో వాదన మార్చిన సీబీఐ
ఓబుళాపురం గనుల లీజుల అక్రమాల కేసు వ్యవహారంపై సీబీఐ వాదన మార్చింది. ఓఎంసీ కేసును విశాఖకు బదిలీ చేయవద్దని హైదరాబాద్ సీబీఐ కోర్టులోనే విచారణ జరపాలని కోరింది. లీజుల కేటాయింపు అక్రమాల కుట్ర ఎక్కువగా హైదరాబాద్లోనే జరిగిందని నివేదించింది. ప్రజాప్రతినిధులు, అధికారులు, ప్రైవేట్ వ్యక్తులు హైదరాబాద్లోనే ఉండి నేరానికి పాల్పడ్డారని తెలిపింది. విశాఖ సీబీఐ కోర్టుకు బదిలీ చేస్తే కేసు విచారణ మరింత ఆలస్యమవుతుందని పేర్కొంది.
పునర్విభజన చట్టం ప్రకారం పూర్తిగా ఆంధ్రప్రదేశ్కి సంబంధించిన అంశాలు మాత్రమే ఏపీకి బదిలీ చేయాలని తెలిపింది. ఈ కేసులో అనంతపురంతోపాటు హైదరాబాద్లో కూడా నేరం జరిగిందని వివరించింది. రాష్ట్ర విభజన జరగకముందే ఓఎంసీ కేసులో అభియోగపత్రాలు దాఖలు చేసినట్లు తెలిపింది. విశాఖకు బదిలీ చేస్తే కేసు విచారణ మరింత జాప్యం జరుగుతుందని సీబీఐ పేర్కొంది.