BJP leaders GVL and Somu Veerraju: విశాఖ కోసం రాజీనామాలు చేస్తామని చెప్పినవారు.. విశాఖకు వాళ్లు చేసిన అభివృద్ధి ఏంటో శ్వేతపత్రం విడుదల చేయాలని భాజపా రాజ్యసభ సభ్యుడు జీవీఎల్ నరసింహారావు డిమాండ్ చేశారు. వైకాపా ప్రభుత్వం రాజధానిని నిర్మించకుండా.. ప్రజల దృష్టి మళ్లించే పనులు చేస్తోందని ఆరోపించారు. తెలంగాణ ప్రభుత్వం.. ఈ రాష్ట్రానికి అన్యాయం చేస్తే తెదేపా, వైకాపాలు ఎందుకు మాట్లాడటం లేదో చెప్పాలని నిలదీశారు. 2024 వరకు హైదరాబాద్లో ఉండే హక్కు ఇస్తే.. ఎందుకు వదిలేశారో చెప్పాలని ప్రశ్నించారు. జగన్ ప్రభుత్వం వచ్చిన వెంటనే సచివాలయంలో భవనాలు ఎందుకు ఇచ్చేశారో చెప్పాలని అడిగారు.
ఇప్పుడు కేసీఆర్... బీఆర్ఎస్గా ఇక్కడ పోటీ చేస్తామంటున్నారని.. రాష్ట్ర విభజన బాధలోనే ఇంకా ఏపీ ప్రజలు ఉన్నారని అన్నారు. విశాఖ అభివృద్ధిలో వైకాపా పాత్ర ఏం లేదని కేవలం భూదందాలు, భూములను కొట్టేయడం తప్ప.. మరేమీ చేయలేదని ఆగ్రహించారు. కేంద్ర ప్రభుత్వం చేసిన అభివృద్ధి తప్ప.. విశాఖలో వైకాపా ఏం చేసిందని ప్రశ్నించారు. వైజాగ్- చెన్నై పారిశ్రామిక కారిడార్ భూసేకరణ కూడా చేయలేకపోయారని విమర్శించారు. ఈ కారిడార్ వస్తే విశాఖ మరింత అభివృద్ధి చెందుతుందని తెలిపారు. ఈ రాష్ట్రంలో సొంతపార్టీని చూసుకోవడం మానేసి.. భాజపాపై దృష్టి పెడుతున్నారని ఎద్దేవా చేశారు.