ఆసుపత్రిలో యువకుడు మృతి.. బంధువుల ఆందోళన

రోడ్డు ప్రమాదంలో గాయపడిన ఓ వ్యక్తి.. విజయవాడలోని ఓ ఆసుపత్రిలో చికిత్స పొందుతూ మరణించాడు. అతని మరణానికి వైద్యుల నిర్లక్ష్యమే కారణమని ఆసుపత్రి వద్ద మృతుడి బంధువులు ఆందోళనకు దిగారు.

కృష్ణా జిల్లా కానూరుకు చెందిన వరప్రసాద్​కు​ ఇటీవల ఓ ప్రమాదంలో తీవ్ర గాయాలయ్యాయి. బంధువులు అతన్ని విజయవాడ నూతన ప్రభుత్వాసుపత్రికి తరలించగా చికిత్స పొందుతూ బుధవారం మరణించాడు. వైద్యుల నిర్లక్ష్యం, విద్యుత్ సరఫరా ఆగినందునే.. వెంటిలేటర్​పై ఆక్సిజన్ అందక వరప్రసాద్ మృతి చెందాడని అతని బంధువులు ఆరోపించారు. తమకు న్యాయం చేయాలని ఆసుపత్రి ఎదుట ఆందోళనకు దిగారు. మృతుని బంధువుల ఆరోపణల్లో వాస్తవం లేదని.. వెంటిలేటర్​కు 6 గంటల పాటు బ్యాకప్ సామర్థ్యం ఉందని ఆసుపత్రి సూపరింటెండెంట్ బాబూలాల్ వివరించారు. కరెంట్ కోతతో ప్రాణం పోయిందని ఆరోపించడం సరికాదన్నారు.