బెజవాడ తెలుగుదేశం నేతల విభేదాలకు చెక్.. కలిసి ముందుకు!

చర్చనీయాంశంగా మారిన బెజవాడ తెలుగుదేశం నేతల విభేదాలకు చెక్ పడింది. రచ్చకెక్కిన తమ్ముళ్లు తిరిగి ఐక్యం కావటంతో.. విజయవాడ తెలుగుదేశంలో అంతర్గత వివాదం సమసిపోయింది. నగరపాలక పీఠంపై తెలుగుదేశం జెండా ఎగుర వేసేందుకు కలసికట్టుగా కృషి చేస్తామని ఆ పార్టీ నేతలు ప్రకటించారు.

పురపాలక ఎన్నికల వేళ విజయవాడ నగర తెలుగుదేశం పార్టీలో భగ్గుమన్న విభేదాలు అధినేత చంద్రబాబు దృష్టి సారించటంతో చల్లబడ్డాయి. ఆదివారం చంద్రబాబు పర్యటనకు సంబంధించి ఎంపీ కేశినేని నాని కనీస సమాచారం ఇవ్వలేదంటూ.. పొలిట్‌బ్యూరో సభ్యుడు బొండా ఉమా, ఎమ్మెల్సీ బుద్దా వెంకన్న, అధికార ప్రతినిధి నాగుల్‌మీరా ఆరోపించారు. బొండా ఉమా ఇంట్లో సమావేశమై నాని వైఖరిపై తీవ్ర విమర్శలు చేశారు.

ముగ్గురు నేతల విమర్శలపై కేశినేని నాని స్పందించారు. పార్టీ ఏది చెప్తే అది చేయటానికి తాను సిద్ధమని పేర్కొన్నారు. ప్రజాస్వామ్యంలో ఎవరి అభిప్రాయాలు వారు చెప్పుకునే హక్కుందన్నారు. తనకు ఎవరితోనూ విబేధాల్లేవని స్పష్టం చేశారు.

విజయవాడ తెలుగుదేశం నేతల బహిరంగ ప్రకటనలపై విశాఖ పర్యటనలో ఉన్న అధినేత చంద్రబాబు రంగంలోకి దిగారు. వెంటనే టెలికాన్ఫరెన్స్ లో ముఖ్య నేతలతో మాట్లాడి తగిన సూచనలు చేశారు. పార్టీ అధినేత ఆదేశాల మేరకు కేశినేని శ్వేత వెంట ఎన్నికల ప్రచారంలో పాల్గొంటూ.. ఆమె విజయానికి కృషి చేస్తామని బొండా ఉమా, బుద్దా వెంకన్న, నాగుల్ మీరా ప్రకటించారు.

కేశినేని శ్వేత.. విజయవాడ పార్లమెంట్ అధ్యక్షులు నెట్టం రఘురాంను వెంట బెట్టుకుని బొండా ఉమ ఇంటికి వెళ్లారు. నగరపాలక సంస్థ ఎన్నికల్లో తనకు సహకరించాల్సిందిగా బొండా ఉమ, బుద్దా వెంకన్న, నాగుల్ మీరాలను కోరారు. శ్వేతతో పాటు ఎన్నికల ప్రచారంలో పాల్గొంటామని నేతలు స్పష్టం చేశారు.

వివాదం మరింత ముదరకుండా ఉండేందుకు ఆదివారం చంద్రబాబు పర్యటనకు తాను దూరంగా ఉండి.. కేశినేని శ్వేత పాల్గొనేలా చేయాలని ఎంపీ నాని నిర్ణయించుకున్నట్లు పార్టీవర్గాలు చెబుతున్నాయి.

ఇదీ చదవండి:శ్వేత అభ్యర్థిత్వాన్ని మేం ఎప్పుడూ వ్యతిరేకించలేదు: తెదేపా నేతలు