Bike accident at Naseempet: తెలంగాణలోని సూర్యాపేట జిల్లా ఆత్మకూర్(ఎస్) మండలం నశింపేట వద్ద రెండు ద్విచక్ర వాహనాలు ఎదురెదురుగా ఢీకొన్నాయి. ఈ ఘటనలో ముగ్గురు అక్కడికక్కడే చనిపోగా.. ఆస్పత్రిలో చికిత్స పొందుతూ మరొకరు ప్రాణాలు విడిచారు. మృతులంతా 25ఏళ్లలోపు యువకులేనని పోలీసులు వెల్లడించారు.
చివ్వెంల-ముకుందాపురం రహదారిపై నశింపేట గ్రామ శివారులో ఉన్న మూలమలుపు వద్ద వేగంగా వస్తున్న ద్విచక్ర వాహనాలు ఢీకొన్నాయి. మృతులు మండల పరిధిలోని తెట్టెకుంట తండాకు చెందిన బానోత్ అరవింద్, బొట్యా తండాకు చెందిన భూక్యా నవీన్, చివ్వెంల మండలం లక్ష్మీనాయక్ తండాకు చెందిన ధరావత్ ఆనంద్, ఏపూర్ తండాకు చెందిన వినేశ్గా గుర్తించారు. అతివేగమే ప్రమాదానికి కారణమని పోలీసులు భావిస్తున్నారు. నలుగురు యువకుల మరణంతో వారి కుటుంబాల్లో విషాదఛాయలు అలుముకున్నాయి.