TDP Protest on Heavy Prices : పెరిగిన ధరలపై..తెదేపా పోరుబాట...

TDP Protest on Heavy Prices: పెరుగుతున్న నిత్యావసరాల ధరలను తగ్గించాలంటూ తెదేపా ఆధ్వర్యంలో నేడు రాష్ట్ర వ్యాప్తంగా నిరసనలు చేపట్టారు. 'ధరలు దిగిరావాలి.. జగన్ దిగిపోవాలి' అంటూ తెదేపా శ్రేణులు నిరసనలకు దిగారు. పెరిగిన నిత్యవసరాల ధరపై పలుచోట్ల ధర్నా చేశారు. భారీ ప్రదర్శనగా తరలివెళ్లి అధికారులకు వినతిపత్రాలు అందజేశారు.

TDP Protest on Heavy Prices : ధరలు పెరుగుదలపై తెలుగుదేశం పార్టీ ఇచ్చిన పిలుపు మేరకు రాష్ట్రవ్యాప్తంగా ఆ పార్టీ శ్రేణులు నిరసనలు చేపట్టారు. 'ధరలు దిగిరావాలి....జగన్ దిగిపోవాలి' అంటూ కృష్ణా జిల్లా నూజివీడులో తెలుగుదేశం కార్యాలయం నుంచి సబ్‌ కలెక్టర్ కార్యాలయం వరకు ర్యాలీ నిర్వహించారు. గుంటూరు జిల్లా బాపట్లలో తెలుగుదేశం ఆధ్వర్యంలో నిరసన ప్రదర్శన చేపట్టి తహసీల్దార్‌కు వినతిపత్రం అందజేశారు. పశ్చిమగోదావరి జిల్లా తణుకులో వినూత్న రీతిలో నిరసన వ్యక్తం చేశారు. నాయకులు మెడలో నిత్యావసర వస్తువుల ప్యాకెట్ల దండలను ధరించి బండి పై కూరగాయలు అమ్ముతూ నిరసన వ్యక్తం చేశారు. తూర్పుగోదావరి జిల్లావ్యాప్తంగా నిరసనలు కొనసాగాయి.

రాజమండ్రిలో ఎమ్మెల్యే ఆదిరెడ్డి భవానీ ఆధ్వర్యంలో వంటావార్పు చేపట్టారు. గ్యాస్‌ సిలిండర్లతో ప్రదర్శన చేశారు. రాజోలులోనూ నిరసనలు కొనసాగాయి.

ఉత్తరాంధ్ర వ్యాప్తంగా ఆందోళనలు మిన్నంటాయి. శ్రీకాకుళంలో మాజీ ఎమ్మెల్యే గుండ లక్ష్మీదేవి నేతృత్వంలో.. డే అండ్ నైట్ కూడలి నుంచి తహసీల్దార్ కార్యాలయం వరకు ర్యాలీ నిర్వహించారు. ఆమదాలవలసలో కూన రవికుమార్ ఆధ్వర్యంలో భారీ ర్యాలీ చేపట్టారు. నిత్యావసరాల ధరలు పెరిగి సామాన్యులు తీవ్ర ఇబ్బందులుపడుతున్నారని నేతలు మండిపడ్డారు. పలాసలోనూ ఆందోళన నిర్వహించారు..

రాయలసీమ వ్యాప్తంగానూ నిరసనలు కొనసాగాయి. అనంతపురం జిల్లా కల్యాణదుర్గంలో ఎన్టీఆర్ భవన్ నుంచి నిరసన ప్రదర్శన చేపట్టారు. చిత్తూరు జిల్లా మదనపల్లెలో తెలుగుదేశం నేతలు ధర్నా చేశారు. పూతలపట్టులో తహసీల్దార్ కార్యాలయం ఎదుట నిరసన తెలిపారు.

ఇదీ చదవండి : CLASSES MERGING EFFECT: తరగతుల విలీనంతో.. విద్యార్థులకు బడి దూరం.. చదువు భారం