CBN on CID police: చింతకాయల విజయ్ ఇంట్లోకి దొంగల్లా వెళ్లడాన్ని ఖండిస్తున్నామని తెదేపా అధినేత చంద్రబాబు అన్నారు. ఇంటికెళ్లి పిల్లలు, పనివాళ్లను భయపెట్టడం దారుణమని విమర్శించారు. నోటీసు ఇచ్చేందుకు వచ్చి డ్రైవర్‌పై ఎందుకు దాడి చేశారని నిలదీశారు. కేసులు, విచారణ పేరుతో పోలీసులను రౌడీల్లా ఉసిగొల్పుతున్నారని మండిపడ్డారు. అయ్యన్న కుటుంబంపై ఆదినుంచి ప్రభుత్వ వైఖరి కక్షపూరితంగా ఉందని ఆరోపించారు. గతంలో నర్సీపట్నంలో అయ్యన్న ఇంటిపై ఇలాగే దాడి చేశారన్నారు. రోజుకో సీఐడీ కేసు, వారానికో అరెస్టు తప్ప మరేం చేయడం లేదని చంద్రబాబు దుయ్యబట్టారు.
"చింతకాయల విజయ్ ఇంట్లోకి దొంగల్లా వెళ్లడాన్ని ఖండిస్తున్నా. ఇంటికెళ్లి పిల్లలు, పనివాళ్లను భయపెట్టడం దారుణం. నోటీసు ఇచ్చేందుకు వచ్చి డ్రైవర్‌పై ఎందుకు దాడి చేశారు?. కేసులు, విచారణ పేరుతో పోలీసులను రౌడీల్లా ఉసిగొల్పుతున్నారు. అయ్యన్న కుటుంబంపై ఆదినుంచి కక్షపూరితంగా ప్రభుత్వ వైఖరి. గతంలో నర్సీపట్నంలో అయ్యన్న ఇంటిపై ఇలాగే దాడి చేశారు. రోజుకో సీఐడీ కేసు, వారానికో అరెస్టు తప్ప మరేం చేయడం లేదు." -చంద్రబాబు
Nara Lokesh on CID police: కోర్టు ఎన్ని సార్లు చివాట్లు పెట్టినా జగన్ సర్కారుకు బుద్ధి రావడం లేదని తెదేపా జాతీయ ప్రధాన కార్యదర్శి నారా లోకేశ్ విమర్శించారు. పోలీస్ వ్యవస్థను రాజకీయ కక్ష సాధింపు సంస్థగా మార్చుకున్నారని ధ్వజమెత్తారు. బీసీ నేత అయన్నపాత్రుడు కుటుంబాన్ని వేధించడమే లక్ష్యంగా ప్రభుత్వ యంత్రాంగాన్ని దుర్వినియోగం చేస్తున్నారని దుయ్యబట్టారు. హైదరాబాద్లోని బంజారాహిల్స్లో ఉన్న ట్రెండ్సెట్ అపార్ట్మెంట్లో చింతకాయల విజయ్ ఇంటికి ఎలాంటి నోటీసులు లేకుండా వెళ్లిన ఏపీ పోలీసులు... అక్రమ అరెస్టుకు ప్రయత్నించడం దారుణమని మండిపడ్డారు. ఎందుకు వచ్చారో చెప్పకుండా తలుపులు బద్దలు కొట్టి ఇంట్లోకి చొరబడి, కుటుంబ సభ్యులు, ఇంట్లో పనిచేసేవారిపై బెదిరింపులకు పాల్పడ్డారని లోకేశ్ ఆరోపించారు. నేరాలు-ఘోరాలు చేస్తున్న వైకాపా నేతలకు ప్రభుత్వం... సన్మానాలు చేసి పదవులు కట్ట బెడుతోందని ఆగ్రహం వ్యక్తం చేశారు. జగన్ రెడ్డి... ప్రజల పక్షాన నిలిచి పోరాడుతున్న తెదేపా నేతలపై అక్రమ కేసులు పెట్టి రాక్షస ఆనందం పొందుతున్నారని మండిపడ్డారు. అయన్నపాత్రుడు కుటుంబాన్ని టచ్ చేసిన ఏ ఒక్కరిని వదిలి పెట్టమన్న ఆయన వైకాపా అధికార మదాన్ని అణిచివేస్తామని హెచ్చరించారు.