ఒక్కరోజైనా జైలులో పెట్టాలనే ఉద్దేశంతోనే అచ్చెన్న డిశ్చార్జ్: తెదేపా నేతలు

మాజీ మంత్రి అచ్చెన్నాయుడు డిశ్చార్జిపై తెదేపా నేతలు మండిపడ్డారు. నిబంధనలకు వ్యతిరేకంగా, బలవంతంగా జీజీహెచ్​ నుంచి డిశ్చార్జ్ చేశారని ఆరోపించారు. రాజకీయ ప్రత్యర్థులను వేధించడం కోసం వైకాపా ప్రభుత్వం అధికార దుర్వినియోగానికి పాల్పడుతోందని విమర్శించారు.

అచ్చెన్నాయుడు బెయిల్ పిటిషన్​పై నేడు కోర్టు తీర్పు ఇవ్వనుండగా.. ఆయన్ను సబ్ జైలుకు పంపడం దుర్మార్గమని మాజీ మంత్రి కాల్వ శ్రీనివాసులు అన్నారు.

'ఒక్కరోజైనా అచ్చెన్నాయుడును జైలులో పెట్టాలనే కుట్రపూరితంగా, నిబంధనలకు వ్యతిరేకంగా ఆసుపత్రి నుంచి డిశ్చార్జ్ చేశారు. ప్రభుత్వ కక్షసాధింపు చర్యల్లో భాగంగానే అచ్చెన్న అరెస్ట్ జరిగింది. వైకాపా ప్రభుత్వం చేస్తున్న ప్రతి తప్పుకు మూల్యం చెల్లించుకోక తప్పదు.'-- కాల్వ శ్రీనివాసులు, గద్దె రామ్మోహన్, తెదేపా నేతలు

బీసీలను అణగదొక్కాలనే

బీసీలను రాజకీయంగా అణగదొక్కే కుట్రలో భాగంగానే అచ్చెన్నాయుడిపై జగన్ కక్ష సాధింపుకు పాల్పడుతున్నారని ఎమ్మెల్సీ బుద్దా వెంకన్న మండిపడ్డారు. అచ్చెన్న ఆరోగ్యం పూర్తిగా కుదటపడకముందే ఆయన్ను డిశ్చార్జ్ చేయించి జైలుకు పంపాలని జగన్ ఆరాటపడుతున్నారని విమర్శించారు.

నియంత అనే పదం జగనని చూసే పుట్టినట్టుందని తెదేపా ఎమ్మెల్సీ బుద్దా నాగజగదీశ్వరారావు విమర్శించారు.

'రెండు సార్లు ఆపరేషన్ చేసిన వ్యక్తికి విశ్రాంతి ఇవ్వకుండా వైద్యులపై ఒత్తిడి తెచ్చి ఆసుపత్రి నుంచి డిశ్చార్ చేయటం దుర్మార్గపు చర్య. అచ్చెన్నాయుడుకి ఏం జరిగినా వైకాపా ప్రభుత్వమే బాధ్యత వహించాల్సి ఉంటుంది.'-- బుద్దా నాగజగదీశ్వరరావు, ఎమ్మెల్సీ

మూల్యం తప్పదు

జగన్ కక్ష సాధింపు చర్యలకు మూల్యం తప్పదని టీడీఎల్పీ విప్ డోలా బాల వీరాంజనేయ స్వామి విమర్శించారు. హుటాహుటిన జీజీహెచ్ నుంచి అచ్చెన్నాయుడు ను డిశ్చార్జ్ చేయడం, వెంటనే జైలుకు తరలించడం ప్రభుత్వ కక్ష సాధింపు చర్యలేనని అన్నారు.

అనారోగ్యంతో ఉన్న అచ్చెన్నాయుడుని జైలుకు పంపడం దుర్మార్గపు చర్యని ఎమ్మెల్సీ గుమ్మడి సంధ్యారాణి ఆరోపించారు. ఆసుపత్రిలో ఉన్న వ్యక్తిని వీల్ చైర్​లో జైలుకి తరలించడం అంటే ఆ వ్యక్తి సంపూర్ణ ఆరోగ్యంతో లేనట్టేనని ఆమె స్పష్టం చేశారు.

ఇవీ చదవండి...