'వాలంటీర్లపై లాఠీలు ఝుళిపించడం అమానుషం'

వాలంటీర్లకు వేతనాలు పెంచుతామన్న సీఎం.. ఇప్పుడు వారిని హింసిస్తున్నారని తెదేపా నేతలు దుయ్యబట్టారు. ఇచ్చిన హామీ ప్రకారం జీతాలు ఎందుకు పెంచలేదని వారు ప్రభుత్వాన్ని ప్రశ్నించారు.

వాలంటీర్లకిచ్చిన జీతాల పెంపు హామీని సీఎం జగన్​ ఎందుకు పట్టించుకోవట్లేదో సమాధానం చెప్పాలని.. తెదేపా ఎమ్మెల్యేలు గోరంట్ల బుచ్చయ్యచౌదరి, అనగాని సత్యప్రసాద్​ ప్రశ్నించారు. వాడుకుని అన్యాయం చేసే నైజాన్ని చిరుద్యోగులపై చూపటం అత్యంత హేయమని దుయ్యబట్టారు. ప్రతి ప్రభుత్వ పనికీ వాలంటీర్లను వాడుకుని వేతనాల చెల్లింపులో వివక్ష చూపటం దుర్మార్గమని ధ్వజమెత్తారు.

ఏడాది క్రితమే వేతనాలను రూ. 8 వేల రూపాయలకు పెంచుతామని ప్రకటించి.. ఇప్పటిదాకా ఎందుకు నోరు మెదపలేదని నిలదీశారు. ఇటీవలే ప్రారంభించిన రేషన్ వాహనాల నిర్వహణ, వారి వేతనాలను ఒక్కసారిగా రూ. 5 వేలు పెంచి వాలంటీర్లపై లాఠీలు ఝుళిపించడం, హింసించడం ఫ్యాక్షన్ మనస్తత్వానికి నిదర్శనమంటూ నేతలు మండిపడ్డారు. వెంటనే వాలంటీర్ల వేతనాలు పెంచాలని డిమాండ్ చేశారు.

ఇదీ చదవండి: