దొంగ ఓట్ల ఘటనపై తిరుపతి వెంకన్న సమక్షంలో ప్రమాణం చేస్తారా?: వర్ల రామయ్య

తిరుపతి లోక్​సభ స్థానంలో వైకాపా గెలుపుపై తెదేపా నేత వర్ల రామయ్య స్పందించారు. ప్రజాస్వామ్య వ్యతిరేక విధానాలతోనే ఈ విజయం సాధించారని ఆరోపించారు. దొంగ ఓట్ల అంశం గురించి ముఖ్యమంత్రి జగన్, మంత్రి పెద్దిరెడ్డి తిరుపతి వెంకన్న సమక్షంలో ప్రమాణం చేసి నిజం చెప్తారా అని ప్రశ్నించారు.

"తిరుపతి లోక్​సభ ఎన్నికల్లో వైకాపా విజయం సాధించడం ఆ పార్టీ నేతలందరినీ ఆత్మ పరిశీనలో పడేసింది నిజం కాదా?" అని తెదేపా సీనియర్ నేత వర్ల రామయ్య ప్రశ్నించారు. ప్రజాస్వామ్య వ్యతిరేక విధానాలు అనుసరించడం వల్లే ఈ గెలుపు లభించిందన్న విషయం ప్రజలందరికీ తెలుసని ఆయన అన్నారు.

దొంగ ఓటర్ కార్డులు ఎక్కడ తయారు చేశారో ముఖ్యమంత్రి జగన్మోహన్ రెడ్డికి, మంత్రి పెద్దిరెడ్డి రామచంద్రారెడ్డికి తెలుసునని వర్ల రామయ్య ఎద్దేవా చేశారు. వారిద్దరు లై-డిటెక్టర్ టెస్టుకు సిద్ధపడితే తిరుపతి లోక్​సభ స్థానంలో గెలుపు ఎవరిదో అన్నది.. రాష్ట్ర ప్రజలందరికీ తెలుస్తుందన్నారు. దొంగఓట్ల అంశం గురించి తమకు ఏమీ తెలియదని ముఖ్యమంత్రి జగన్, మంత్రి పెద్దిరెడ్డి... తిరుపతి వెంకన్న సమక్షంలో ప్రమాణం చేసి చెప్పగలరా... అని సవాల్ చేశారు.

ఇదీ చదవండి: