మహిళా ద్రోహిగా సాగుతున్న పాలనకు వ్యతిరేకంగా.. ఈనెల 31న తెదేపా కేంద్ర కార్యాలయంలో తలపెట్టిన నారీ సంకల్ప దీక్షకు తాను సంపూర్ణ మద్దతు ఇస్తున్నట్లు నారా లోకేశ్ స్పష్టం చేశారు. తెలుగు మహిళా ఆధ్వర్యంలో జరగనున్న దీక్షకు మద్దతు ప్రకటించారు. భద్రత - భవిష్యత్ కోసం మహిళలు సాగించే పోరాటానికి అండగా ఉంటానని లోకేశ్ హామీ ఇచ్చారు. నారీ సంకల్ప దీక్షకు సంబంధించిన ఓ వీడియోను తన ట్విట్టర్ ఖాతాకు జత చేశారు.
అకృత్యాలకు హద్దేది..?
రాష్ట్రంలోని అక్కచెల్లెమ్మలపై కురిపించిన ఆప్యాయత ఎక్కడికి పోయింది జగన్‌గారూ? అంటూ.. తెదేపా జాతీయ ప్రధాన కార్యదర్శి నారా లోకేశ్ ముఖ్యమంత్రిపై వ్యంగ్యాస్త్రాలు సంధించారు. రోజుకో దుర్మార్గుడు ఆడబిడ్డలపై ఆకృత్యాలకు పాల్పడుతున్నారని లోకేశ్ ఆరోపించారు. రాష్ట్ర వ్యాప్తంగా ఆడబిడ్డలపై ఆకృత్యాలు పెరుగుతున్నా.. సీఎం జగన్ పట్టించుకున్న దాఖలాల్లేవంటూ ఆగ్రహం వ్యక్తం చేశారు. వైకాపా పాలనలో బాగుండటం దేవుడెరుగు.. బతికి ఉండటమే అదృష్టంగా భావించే దురదృష్ట రోజులు దాపురించాయని విమర్శించారు. పట్టపగలు రోడ్డున మహిళలు నడవలేని దుస్థితి నెలకొందని వాపోయారు.