ఎండల ఎఫెక్ట్... సామాన్యుడికి కూర'గాయాలు'

సామాన్యుడి కూరగాయ టమాట ధర మళ్లీ పెరిగింది. కొనే పరిస్థితి లేదని ప్రజలు వాపోతున్నారు. పచ్చిమిర్చి, క్యాప్సికం, బీన్స్ ధరలూ ఆకాశన్నంటాయి. బెండ, దొండ వంటి కూరగాయల ధరలు అందుబాటులో ఉండటం కొంత ఊరటనిస్తున్నాయి. ఇతర రాష్ట్రాల నుంచి టమాటాలు దిగుమతి చేసుకోవడం కారణంగా నాణ్యమైన సరకు రావడంలేదని వ్యాపారులు చెప్తుండగా... తప్పని సరిపరిస్థితుల్లో కొనాల్సి వస్తోందని వినియోగదారులు అంటున్నారు. రోజురోజుకూ పెరుగుతున్న ఉష్ణోగ్రతలు... కూరగాయల ధరలను ఇంకెత ప్రియం చేస్తాయోనని నగరవాసులు చర్చించుకుంటున్నారు.

ఈ వేసవి సామాన్య ప్రజానికానికి ఎన్నో కష్టాలను తీసుకోస్తోంది. నీటి ఎద్దడి, విపరీతమైన ఎండతోపాటు... కూరగాయల ధలనూ పెంచుతోంది. కొద్దిరోజుల ముందు కిలో టమాట రూ.15 ఉండగా... ప్రస్తుతం రెండింతలు పెరిగి 32 రూపాయలకు చేరుకుంది. వీధుల్లో తిరిగి అమ్మేవారు 50 రూపాయలకు విక్రయిస్తున్నారు. గతంలో జిల్లా పరిసర ప్రాంతాలనుంచి కూరగాయలు తీసుకొచ్చి మార్కెట్లలో అమ్మేవారు. ప్రస్తుతం పెరిగిన ఉష్ణోగ్రతలు, నీటి లేమి కారణంగా... రైతులు కూరగాయల పంటల వైపు ఆసక్తి చూపడంలేదు. వేరే రాష్ట్రాల నుండి దిగుమతి చేసుకోవడంతో... ధరలు పెరుగుతున్నాయి.

దండుకుంటున్న దళారులు...
దీన్నే అవకాశంగా భావించి దళారులు దండుకుంటున్నారు. అన్నింటికన్నా టమాట వినియోగం ఎక్కువగా ఉండటంతో... ధరలు అమాంతం పెంచేస్తున్నారు. రాష్ట్రంలోని 120 రైతు బజార్లకు వారానికి 15వేల క్వింటాళ్ల టమాట దిగుమతి అవుతుండగా... అంతకు 10 రెట్లు బహిరంగ మార్కెట్లలో విక్రయిస్తున్నారు. శుభకార్యాల సీజన్‌ కూడా కావడంతో ధరలు తగ్గే పరిస్థితి లేదని వ్యాపారులు అంటున్నారు. ఇదిలావుంటే టమాట రైతులకు కాస్తంత గిట్టుబాటు ధర లభిస్తోందని చెప్తున్నారు. మొత్తం మీద పెరుగుతున్న వేసవి ఉష్ణోగ్రతల ప్రభావం కూరగాయల ధరలపై పడటం సామాన్యుడికి కొత్త భారమనే చెప్పాలి.