Russia- Ukraine War: ఉక్రెయిన్‌లో రష్యా దాడులు తీవ్రరూపం దాలుస్తుంటే మరోవైపు అక్కడున్న భారతీయులను స్వదేశానికి తరలించే ప్రక్రియ కొనసాగుతోంది. రైలు మార్గంలో సుమారు 1500 మంది భారతీయ విద్యార్థులు సరిహద్దు ప్రాంతాలకు చేరుకోవడంతో వారి తల్లిదండ్రులు ఊపిరి పీల్చుకుంటున్నారు. ఇందులో వంద మందికిపైగా తెలుగువాళ్లు ఉన్నారు. ఉక్రెయిన్‌లో చిక్కుకుపోయిన వినుకొండ వైద్య విద్యార్థులు కటకం ప్రసన్న, సుంకర నాగమణి సురక్షితంగా బుడాపెస్ట్ చేరారు. కర్నూలు జిల్లా నంద్యాలకు చెందిన జతిన్ తేజ రోమెనియాకు చేరుకోగా.. తేజ తల్లిదండ్రులకు ఎమ్మెల్యే శిల్పా రవిచంద్ర కిషోర్ రెడ్డి ధైర్యం చెప్పారు. వివిధ ప్రాంతాలకు చెందిన మరో ఐదు మంది విద్యార్థులు దిల్లీ నుంచి గన్నవరం చేరుకున్నారు. ప్రకాశం జిల్లా దేశాయిపేటకు చెందిన యర్రా అఖిల..చింతపూడి వాసి రీణా తెజోన్మయి భయానక పరిస్థితులు తరువాత ఇంటికి చేరారు.
మా పిల్లల్ని స్వదేశానికి రప్పించండి..
చిత్తూరు జిల్లా చంద్రగిరి మండలానికి చెందిన నలుగురు విద్యార్థులు ఉక్రెయిన్‌లో వైద్యవిద్య అభ్యసిస్తున్నారు. వీరిలో ఓ విద్యార్థిని ఇంటికి చేరుకున్నారు. మరో ముగ్గురు ప్రభుత్వ సాయం కోసం ఎదురుచూస్తున్నారు. ఉక్రెయిన్‌లో చిక్కుకున్న తమ కుమారుడు రవితేజను స్వదేశానికి రప్పించాలని విజయవాడకు చెందిన రాధాకుమారి విజ్ఞప్తి చేశారు. అనంతపురం జిల్లా పామిడికి చెందిన నవాజ్ షరీఫ్‌ను ఉక్రెయిన్ నుంచి భారత్‌కు తీసుకురావాలని అతని తల్లిదండ్రులు తహశీల్దార్‌కు వినతి పత్రం ఇచ్చారు.