కేంద్ర ప్రాయోజిత పథకాల నిధులను ఇష్టారీతిన ఖర్చు చేయకుండా కట్టడి చేయడంతో రాష్ట్రం ప్రత్యామ్నాయ మార్గాలపై దృష్టి పెట్టగా బ్యాంకుల నుంచి తిరస్కారం ఎదురైంది. కేంద్ర నిధుల ఆధారంగా బ్యాంకుల నుంచి రుణాలు, ఓవర్‌డ్రాఫ్ట్‌లను పొందాలని అనుకున్న రాష్ట్ర ప్రభుత్వ ఈ ఎత్తుగడకు సానుకూల ఫలితాలు రాలేదు. దీంతో ఆర్థికశాఖ అధికారులు ఆలోచనలో పడ్డారు.సాధారణంగా ఆర్థిక నిర్వహణలో అనేక మార్గాలను అనుసరిస్తారు. నిధులెలా వచ్చినా తొలుత అవసరాలను తీర్చుకుని తర్వాత సర్దుబాట్లు చేసుకుంటారు. అనేక ఏళ్లుగా కేంద్ర ప్రాయోజిత పథకాల నిధులను కేంద్రం ఇస్తుంటే వాటిని పీడీ ఖాతాలకు మళ్లించి ఇతర అవసరాలకు వినియోగించుకుని, తర్వాత సర్దుబాటు చేయడం చాలా రాష్ట్రాల్లో ఉంది. ఇప్పుడు ఆ నిధుల వినియోగ నిబంధనలు మారాయి.
ఈ ఏడాది జులై ఒకటి నుంచి కొత్త నిబంధనల అమలుకు సమ్మతి తెలియజేయాలని రాష్ట్రాలను కేంద్రం కోరింది. ఈ విషయంలో ఆంధ్రప్రదేశ్ ఇంకా స్పందించాల్సి ఉంది. మరోవైపు కేంద్ర నిధులను నేరుగా ఇతర అవసరాలకు వాడుకునే అవకాశం లేకపోవడంతో.. రాష్ట్రం కొత్త ఎత్తుగడ వేసింది. కేంద్ర ప్రాయోజిత పథకాల నిధులను బ్యాంకులో జమ చేయాల్సి ఉన్నందున ఆ నిల్వల మొత్తానికి సమంగా రుణాలు తీసుకోవడంగానీ, ఓవర్‌డ్రాఫ్ట్‌కుగానీ వెళ్లాలని యోచించింది. ఈ ప్రతిపాదనకు బ్యాంకుల నుంచి సానుకూల స్పందన రాకపోగా, అవి కూడా కట్టడి చేశాయి.
బ్యాంకుల ఖాతాలకు నిధులు..
కేంద్ర ప్రాయోజిత పథకాల నిధులు రాష్ట్రాల ఖాతాలకు చేరిన 21 రోజుల్లోగా రాష్ట్ర ప్రభుత్వాలు ఆ మొత్తాన్ని సింగిల్‌ నోడల్‌ ఏజెన్సీ ఖాతాలకు బదలాయించాలి. కేంద్రం తన వాటా విడుదల చేసిన 40 రోజుల్లోగా రాష్ట్రం తన వాటా నిధులను ఆ ఖాతాల్లో వేయాలి. ఒక పథకం నిధులన్నీ ఒకే బ్యాంకులో ఉండాలని, వాటి వినియోగం, ఖర్చుపై మ్యాపింగ్‌ చేయాలని కేంద్రం నిర్దేశించింది. దీనివల్ల రాష్ట్ర ఆర్థిక అవసరాల విషయంలో ఇబ్బందులు రానున్నాయి.