గడిచిన రెండేళ్లుగా అన్ని రంగాలపై తీవ్ర ప్రతికూల ప్రభావం చూపుతోన్న కరోనా మహమ్మారి రైల్వేపై కూడా పెను ప్రభావం చూపింది. కరోనా వ్యాప్తితో గతేడాది, ఈ ఏడాది లాక్ డౌన్ కాలంలో ప్రయాణికుల రైళ్ల రాకపోకలు చాలా కాలం పాటు నిలిచిపోయాయి. కరోనా వ్యాప్తితో సాధారణ రైళ్లన్నింటినీ నిలిపివేసిన రైల్వే శాఖ... కేవలం పండుగల కోసం ప్రత్యేక రైళ్లను మాత్రమే పట్టాలెక్కించింది. కరోనా వ్యాప్తి చెందుతుందన్న భయంతో రైళ్లలో ప్రయాణాలకు ప్రయాణికులు వెనుకంజ వేశారు. ఫలితంగా ప్రయాణికుల రవాణా ద్వారా వచ్చే రాబడి గణనీయంగా తగ్గింది. ఇదే సమయంలో ప్రత్యామ్నాయ విధానాలపై దృష్టి పెట్టిన రైల్వే శాఖ సరకు రవాణాను పెంచింది. ఇందులో భాగంగా దక్షిణ మధ్య రైల్వే.. రికార్డు ఫలితాలను నమోదు చేసింది.
తక్కువ ఖర్చు.. ఎక్కువ రవాణా
లాక్ డౌన్తో చాలా వాహనాలు నిలిచిపోయాయి. దీంతో నిత్యావసర సరుకుల రవాణా కోసం పలు ప్రాంతాల నుంచి అదనంగా గూడ్స్ రైళ్లను ఏర్పాటు చేసింది దక్షిణ మధ్య రైల్వే. తెలుగు రాష్ట్రాలు సహా దేశంలోని పలు ప్రాంతాల మధ్య సరకు రవాణా రైళ్లను నడిపింది. రైళ్లకు డబుల్ ఇంజిన్లను ఏర్పాటు చేసి బోగీలు పెంచి ...ఒకేసారి రెట్టింపు సరకును చేరవేసింది. తద్వారా తక్కువ ఖర్చుతో ఎక్కువగా సరకు రవాణా చేసింది. బొగ్గు, సిమెంట్, ఎరువులు, వ్యవసాయ ఉత్పత్తులు సహా పలు రకాల నిత్యావసరాలను సరఫరా చేసింది. ఉన్నతాధికారులు తీసుకున్న నిర్ణయం ... దక్షిణ మధ్య రైల్వేకి సరకు రవాణాలో ఆదాయం పంట పండుతోంది. సరుకు రవాణాలో దక్షిణ మధ్య రైల్వే అభివృద్ధి పథంలో కొనసాగుతోంది.
51 శాతం అధికం..!
గతేడాది ఆగస్టులో జరిగిన సరకు రవాణా లోడింగ్‌తో పోలిస్తే ఈ ఏడాది ఆగస్టులో 51 శాతం అధికంగా చేసినట్లు దక్షిణ మధ్య రైల్వే నివేదించింది. సిమెంట్ లోడింగ్లో గత సంవత్సరాలోని ఏ ఆగస్టు నెలతో పోల్చినా 2021 ఆగస్టులో మెరుగైన ఫలితాలు నమోదు చేసినట్లు తెలిపింది. ఆగస్టు 2021 నెలలో జోన్‌లో మొత్తం మీద 9.5 మిలియన్‌ టన్నుల సరకు లోడింగ్ అయ్యింది. ఇదే 2020 ఆగస్టులో జరిగిన 6.3 మిలియన్‌ టన్నుల లోడిరగ్‌తో పోలిస్తే 51% అధికం. గత సంవత్సరం ఇదే సమయంతో పోలిస్తే 2021 ఆగస్టు నెలలో అన్ని రకాల సరుకులు అధికంగా లోడిరగ్‌ కావడంతో ప్రస్తుత సరుకు రవాణా లోడింగ్ గణనీయంగా పుంజుకుంది. సిమెంట్ రంగానికి సంబంధించి రైల్వే వారిచే ఎప్పటికప్పుడు చేపట్టిన వివిధ వినూత్న విధానాలు, జోన్‌లోని బీడీయూ బృందాల కృషితో ఈ ఏడాది ఆగస్టులో సిమెంట్ 2.93 మిలియన్‌ టన్నుల లోడింగ్ జరిగినట్లు దక్షిణ మధ్య రైల్వే తెలిపింది. ఇది 2020 ఆగస్టులో జరిగిన 1.59 మిలియన్‌ టన్నుల లోడిరగ్‌తో పోలిస్తే 84% అధికం. సిమెంట్ లోడింగ్లో ఇంతకుముందు సంవత్సరాలలోని ఏ ఆగస్టు నెలతో పోల్చినా, ప్రస్తుత 2021 ఆగస్టు నెలలో జరిగిన సిమెంట్ లోడింగ్లో మెరుగైన ఫలితాలు నమోదయ్యాయి.