సేవా భారతి సంస్థ 12 ఏళ్ల క్రితం సేవా ప్రస్థానాన్ని ప్రారంభించింది. ఆంధ్ర, తెలంగాణలోని అత్యంత వెనుకబడిన గిరిజన, ఆదివాసీ ప్రాంతాలున్న తూర్పు, పశ్చిమ గోదావరి జిల్లాలు, ఖమ్మం జిల్లాలను ఇందుకోసం ఎంచుకుంది. గిరిజన, ఆదివాసీ పిల్లలను అతి కష్టంమీద బడికి అలవాటు చేసేందుకు ప్రయత్నించింది. చదువుల గురించి కనీసం పరిజ్ఞానం లేని తల్లిదండ్రులు మొదట్లో అంగీకరించలేదు. కానీ ఆ తర్వాత వారిలో మార్పు మొదలైంది. పిల్లలు చదువుకుంటామంటే సరేనన్నారు. చదువుకోవడమే కాదు ఇప్పుడు ఏకంగా పాతికమందికి పైగా ప్రభుత్వ ఉద్యోగాలు, పదుల సంఖ్యలో ప్రైవేటు ఉద్యోగాలు చేస్తున్నారు. సేవా భారతి సంస్థ ఇటీవల ఆత్మీయ సమ్మేళనాన్ని నిర్వహించింది. సంస్థ అందించిన ప్రోత్సాహంతో పైకి ఎదిగిన, ఎదుగుతున్న వారందరూ తమ అంతరంగాన్ని ఈ కార్యక్రమంలో ఆవిష్కరించారు.
అన్ని రంగాల్లోనూ ...
సేవా భారతి సంస్థ అందించిన ప్రోత్సాహంతో చాలామంది వైద్యులు, నర్సులు, ఇంజినీర్లు, బ్యాంక్ మేనేజర్లు, సైనికులు, ఎమ్ఎన్సీ కంపెనీల్లో ఉద్యోగులుగా రాణిస్తున్నారు. తమ జీవితాల్లో ఈ వెలుగులకు సేవాభారతే కారణమని చెబుతున్నారు. ఒకప్పుడు పశువులు కాసేందుకు వెళ్లిన అమ్మాయి... నర్సుగా రాణిస్తోందంటే తల్లిదండ్రులు ఎంతో గర్విస్తున్నారు. తమ ప్రాంతంలో ఇప్పటికీ కనీస వసతులు లేవంటున్న ఆదివాసీ యువత.. తాము అక్కడి నుంచి బయటపడి అన్నిరంగాల్లో రాణిస్తున్నామని వెల్లడించారు.