ప్రకాశం బ్యారేజీపై కవాతు నిర్వహించేందుకు వచ్చిన రాజధాని మహిళలను పోలీసులు అడ్డుకుని.. వారిని అరెస్టు చేశారు. అంతర్జాతీయ మహిళా దినోత్సవం సందర్భంగా.. తమ ఉద్యమాన్ని ప్రపంచం దృష్టికి తీసుకెళ్లేందుకు అమరావతి మహిళలు ప్రకాశం బ్యారేజీపై కవాతుకు పిలుపునిచ్చారు. దీంతో అప్రమత్తమైన పోలీసులు తెల్లవారుజామునుంచే రాజధాని గ్రామాల్లో తనిఖీలు నిర్వహించారు. ఎవరిని రోడ్డుపైకి రాకుండా పికెటింగ్ ఏర్పాటు చేశారు. పోలీసుల తీరును నిరసిస్తూ మందడంలో మహిళలు రోడ్డుపై బైఠాయించారు. బ్యారేజీకిపైకి వెళ్తున్న మహిళలను పోలీసులు అరెస్టు చేసి మంగళగిరి, తాడేపల్లి పోలీస్ స్టేషన్లకు తరలించారు.
పోలీసుల అడ్డగింతపై మహిళా రైతుల నిరసన
రాజధాని కోసం ఉద్యమం చేపడుతున్న మహిళలు.. సీడ్ ఆక్సిస్ రోడ్డును దిగ్భందించారు. అనంతరం రాయపూడి నుంచి మందడం వరకు వస్తున్న మహిళలను పోలీసులు వెలగపూడి వద్ద అడ్డుకున్నారు. రోడ్డుపై ముళ్లకంచెలు వేసి రాకపోకలను నిలువరించారు. మందడం శివాలయం సెంటర్లో.. మహిళలు రోడ్డుపై బైఠాయించారు. అమరావతికి మద్దతుగా నినాదాలు చేశారు. ధర్నా చేస్తున్న మహిళలకు అల్పాహారం అందిస్తుండగా.. పోలీసులు అడ్డుకోవడంపై రైతుల ఆగ్రహం వ్యక్తం చేశారు. పోలీసుల తీరును నిరసిస్తూ మహిళలు పురుగు మందు డబ్బాలు చేతబట్టుకున్నారు. అల్పాహారంలో పురుగుల మందు కలుపుకొని సామూహికంగా ప్రాణాలు వదిలేందుకు సిద్ధమన్నారు. స్పందించిన పోలీసులు.. మహిళల వద్ద నుంచి పురుగుల మందు డబ్బా లాక్కున్నారు.