రాష్ట్ర ప్రభుత్వం కొత్తగా ఏర్పాటు చేయబోయే జిల్లాల్లో ఒకదానికి మన్యం వీరుడు అల్లూరి సీతారామరాజు పేరు పెట్టాలని జనసేన అధినేత పవన్ కల్యాణ్ డిమాండ్ చేశారు. అల్లూరి జయంతి సందర్భంగా జనసేన తరఫున అంజలి ఘటించారు. పీడిత వర్గాల్లో చైతన్యం రగిలించి... బ్రిటిషర్లకు వ్యతిరేకంగా పోరు సాగించిన అల్లూరిని తెలుగు నేల ఎన్నటికీ మరువదన్నారు. సాయుధ పోరాటం ద్వారా నాటి బ్రిటిష్ పాలకులపై పోరు సాగించిన ఆయన సాహసం చిరస్మరణీయమని అభివర్ణించారు.
భావితరాలకు అల్లూరి సీతారామరాజు ఒక స్ఫూర్తిశీలి అని... ఆయన త్యాగనిరతి, సాహసం యువత ఆదర్శంగా తీసుకోవాలని పేర్కొన్నారు. అల్లూరి సీతారామరాజు జన్మించిన పాండ్రంగి గ్రామాన్ని ఒక సందర్శనీయ క్షేత్రంగా అభివృద్ధి చేయాలని డిమాండ్ చేశారు.