మరో రెండు రెవెన్యూ డివిజన్లు ఏర్పాటు చేస్తూ నోటిఫికేషన్

19:00 April 12

కోనసీమ, కడప జిల్లాల్లో 2 రెవెన్యూ డివిజన్లు

జిల్లాల పునర్​వ్యస్థీకరణలో భాగంగా కడప, కోనసీమ జిల్లాలో కొత్తగా రెండు రెవెన్యూ డివిజన్లను ఏర్పాటు చేస్తూ రాష్ట్ర ప్రభుత్వం ప్రాథమిక నోటిఫికేషన్ జారీ చేసింది. కోనసీమ జిల్లాలోని రామచంద్రాపురం, అమలాపురం డివిజన్లలోని 7 మండలాలను కొత్తపేట రెవెన్యూ డివిజన్​గా ప్రతిపాదిస్తూ నోటిఫికేషన్ ఇచ్చారు. కడప జిల్లాలో కొత్త రెవెన్యూ డివిజన్​గా పులివెందులను ప్రకటిస్తూ ప్రాథమిక నోటిఫికేషన్ ఇచ్చారు. జమ్మలమడుగు, కడప రెవెన్యూ డివిజన్లలోని 8 మండలాలను వేరు చేసి కొత్తగా పులివెందుల రెవెన్యూ డివిజన్​ను ఏర్పాటు చేశారు. పులివెందుల రెవెన్యూ డివిజన్​తో కడప జిల్లాలో రెవెన్యూ డివిజన్ల సంఖ్య నాలుగుకు పెరిగింది.

మరోవైపు కృష్ణా జిల్లాలో కొత్తగా ఏర్పాటైన ఉయ్యూరు రెవెన్యూ డివిజన్​లో పామర్రు మండలాన్ని, మచిలీపట్నంలో ఘంటసాల మండలాన్ని కలుపుతూ నోటిఫికేషన్ ఇచ్చారు. అటు చిత్తూరు జిల్లాలో నగరి రెవెన్యూ డివిజన్​లోని రెండు మండలాలను చిత్తూరు రెవన్యూ డివిజన్​లోకి మారుస్తూ నోటిఫికేషన్ జారీ చేశారు. నగరిలోని శ్రీరంగరాజపురం, వెదురుకుప్పం మండలాలను చిత్తూరు రెవన్యూ డివిజన్​కు మార్పు చేస్తూ నోటిఫికేషన్ విడుదల చేశారు.

• కొత్తపేట రెవెన్యూ డివిజన్​లోని మండలాలు: ఆలమూరు, ఆత్రేయపురం, రావులపాలెం, కొత్తపేట, పి.గన్నవరం, అంబాజీపేట, అయినవిల్లి
• పులివెందుల రెవెన్యూ డివిజన్​లోని మండలాలు: సింహాద్రిపురం, లింగాల, తొండూరు, పులివెందుల, వేముల, వెంపల్లి, చక్రాయపేట, వీరపునాయునిపల్లె

ఇదీ చదవండి: నన్నలా అంటే.. సీఎం జగన్​ను ఇలా అంటాం: పవన్